Ko Saulo ne eke mo patuiki fakamua ha Isaraela. Ka e tiaki e Iehova a ia, ti fifili a Tavita ke eke mo patuiki ke hukui aki a ia. Loga e tau mena ka iloa e tautolu hagaao ki a Tavita. He vahā fuata, ne tau atu a ia ke he tupua ko Koliato. Fai magaaho he mole ne hola a ia mai he patuiki mahekeheke ko Saulo. Ti ko e fifine mata fulufuluola ko Apikaila ne taofi a ia mai he taute e mena goagoa.

Fakaako foki a tautolu ke he tau mena loga hagaao ke he tama ha Tavita ko Solomona, ne hukui a Tavita ko e patuiki a Isaraela. Ko e tau patuiki tokotolu fakamua ha Isaraela ne igatia ai mo e pule ke he 40 e tau. He mole e mate ha Solomona, ne vevehe a Isaraela ke he ua e kautu, ko e kautu he faahi toga mo e faahi tokelau.

Ne tū e kautu he magafaoa toko 10 he faahi tokelau ke he 257 e tau ato moumou he tau Asuria. Ti 133 e tau he mole, ne moumou foki e kautu he magafaoa ne ua he faahi toga. Ko e magaaho nei ne uta fakapaea ai e tau Isaraela ki Papelonia. Ti ko e Vala FĀ kua 510 e tau ne putoia ai he fakamauaga tuai, ti loga e tau mena ofoofogia ne tutupu he magahala ia ka kitia e tautolu.