Saulo e bile kgoši ya pele ya Isiraele. Eupša Jehofa o ile a mo lahla gomme Dafida a kgethwa gore e be kgoši legatong la gagwe. Re tlo ithuta dilo tše dintši ka Dafida. Ge e be e sa le mofsa, o ile a lwa le senatla seo se bitšwago Goliata. Ka morago a tšhaba Kgoši Saulo yo a bego a na le mona. Ke moka mosadi yo mobotse yo a bitšwago Abigaile o ile a mo thibela go dira selo se itšego sa bošilo.

Ka morago ga moo, re tlo ithuta dilo tše dintši ka morwa wa Dafida e lego Solomone, yoo a ilego a hlatlama Dafida go ba kgoši ya Isiraele. Kgoši e nngwe le e nngwe ya dikgoši tše tharo tša pele tša Isiraele e bušitše nywaga e 40. Ka morago ga lehu la Solomone, Isiraele e ile ya arogana ya ba mebušo e mebedi, ya ba mmušo wa ka leboa le wa ka borwa.

Mmušo wa ka leboa wa meloko e 10 o bile gona ka nywaga e 257 pele ga ge o ka senywa ke Baasiria. Ke moka nywaga e 133 ka morago, mmušo wa ka borwa wa meloko e mebedi le wona o ile wa senywa. Mo nakong ye, Baisiraele ba ile ba išwa bothopša Babilona. Ka gona, Karolo ye ya BONE e akaretša nywaga e 510 ya histori, e lego nako yeo ka yona go bilego le ditiragalo tše dintši kudu.