Kua riro e ko Saula te ariki mua o Iseraela. Inara kua kopae a Iehova iaia, e kua ikiia a Davida ei ariki i te mono iaia. E maata ta tatou apinga ka kite mai no runga ia Davida. I tona mapu anga, kua ta aia i te tuputupua ia Golia. Muri mai kua oro aia mei te ariki vareae ko Saula. E oti kua tapu te vaine manea ko Abigaila iaia kia kore e rave i tetai angaanga tau kore.

Aru mai, e maata ta tatou ka kite no runga i te tamaiti a Davida ko Solomona, tei mono i te ngai o Davida ei ariki no Iseraela. Kua tutara tataki tai te au ariki mua e toru o Iseraela no te 40 mataiti. Muri ake i te matenga o Solomona, kua akatuangaia a Iseraela ki roto i te nga patireia e rua, ko te patireia apatokerau e te patireia apatonga.

Ko te patireia apatokerau o te kopu 10 kua pou e 257 mataiti i te tutara anga i mua ake ka takoreia ai e to Asura. I reira e 133 mataiti i muri mai, kua takore katoaia te patireia apatonga o te kopu e rua. I te reira tuatau kua apaiia to Iseraela ei tuikaa ki Babulonia. No reira no te Tuanga A, e 510 mataiti o te tuatua enua i pou, roto i teia tuatau e maata te au tupuanga puapinga i te tuatau i topa ta tatou i kite mai.