Saül aga kozo gbia ti Israël. Me Jéhovah ake lo, na lo soro David ti ga gbia na place ti lo. E yeke manda ande ye mingi na ndo ti David. Na lâ ti maseka ti lo, David atiri na Goliath, mbeni kota yongoro zo. Na pekoni, David akpe yongoro na tere ti gbia Saül, zo so bê asara lo. Mbeni lâ, Abigaïl, so ayeke pendere wali mingi, akanga lege na lo ti sara mbeni ye ti sioni.

E yeke manda ande nga ye mingi na ndo ti Salomon, molenge ti David, so aga gbia ti Israël na peko ti babâ ti lo. Akozo gbia ota ti Israël akomande ala oko oko kue ngu 40. Na peko ti kuâ ti Salomon, yâ ti Israël akangbi ti ga aroyaume use: royaume ti banga na royaume ti mbongo.

Royaume ti banga ayeke na akete mara 10 ti Israël, na a ninga ngu 257 kozoni si azo ti Assyrie aga afuti ni. Angu 133 na pekoni, a futi nga royaume ti bongo so ayeke na akete mara use ti Israël. Na ngoi ni so, a gue na azo ti Israël na ngbâa na Babylone. Tongaso, MBAGE 4 so asara tënë ti aye so asi na yâ ti angu 510, na aye mingi asi so e yeke bâ ni ande.