Saúl kʼuch u beetuba u yáax reyil Israel. Baʼaleʼ maʼ lúub utsil tiʼ Jéeobaiʼ, ka yéeyaʼab David u beetuba reyil. Yaan k-kanik baʼaxoʼob tu beetaj David. Tu táankelmileʼ baʼatelnaj yéetel nuxiʼi filisteo Goliat. Ka máan tsʼeʼetsʼek kʼiineʼ púutsʼ tiʼ kʼasaʼan Saúl. X-kiʼichpam Abigaileʼ tu yáantaj David yoʼolal maʼ u beetik upʼéel baʼal maʼ maʼalobiʼ.

Ku tsʼoʼokleʼ yaan k-kanik baʼaxoʼob tu beetaj Salomón, u paal David, le máax kʼuch u beetuba reyil tiʼ Israel ku tsʼoʼokol Davidoʼ. Le yáax óoxtúul reyoʼoboʼ cuarenta jaʼaboʼob xáanchaj u gobernar cada utúul. Ka kíim Salomoneʼ, u kaajil Israeleʼ jatsaʼab ich kaʼapʼéel reino, u reinoi xaman yéetel u reinoi noojol.

U reinoi le diez chʼiʼibaloʼob yaan xamanoʼ xáanchaj doscientos cincuentai siete jaʼaboʼob, le maʼiliʼ xuʼulsaʼaktiʼob tumen le asirioʼoboʼ. Máan túun ciento treintai tres jaʼaboʼob tsʼoʼokkeʼ, ka xuʼulsaʼab xan tiʼ u reinoi le kaʼapʼéel chʼiʼibal yaan noojoloʼ. Teʼ kʼiinoʼob jeʼeloʼ le israelitaʼoboʼ bisaʼaboʼob palitsiltbil Babilonia. Bey túunoʼ yaan quinientos diez jaʼaboʼob tiʼ tsikbalil ich le KAN Jaatsaʼ, tu yáamil tuláakal le jaʼaboʼobaʼ yaʼab nukuch baʼaloʼob úuchiʼ.