4 NDAA

Dede primé rey stiʼ Israel hasta ra guyécabe esclavu Babilonia

Saúl beeda gaca primé rey stiʼ Israel. Peru Jiobá gulee laabe, ne gulibe David para gaca rey. Zánnanu stale de David. Zánnanu de que dxi nahuiinibe gudindenebe ti gigante láʼ Goliat. Despué bixooñebe de lu naʼ Saúl. Laaca zúʼyanu ximodo bicueeza Abigail de ñaca xiixa guendahuati.

Despué zazíʼdinu stale de Salomón xiiñiʼ David, laabe guyuube xlugar bixhózebe casi rey stiʼ guidxi Israel. Ca guionnaʼ primé rey stiʼ Israel la? biʼniʼ gobernarcaʼ pur cuarenta iza cada tóbicaʼ. Despué de guti Salomón, guidxi Israel gulaa ni pur chupa reinu, ti reinu de ladu guiaʼ ne tobi de ladu gueteʼ.

Reinu stiʼ chii tribu de ladu guiaʼ que bindaa ni chupa gayuaa cincuenta y siete iza ante gunitilú ca asiriu ca ni. Ti gayuaa treinta y tres iza despué, reinu stiʼ chupa tribu de ladu gueteʼ que laaca binitilú. Biaje riʼ la? rinécabe ca israelita casi esclavu Babilonia. Biaʼsi rizaa gaayuʼ gayuaa chii iza de historia lu 4 NDAA riʼ, ne lu ca dxi riʼ la? raca stale cosa.