Ododo 56

Caulo​—Kabaka Mukwongo me Icrael

NEN Camuel ka onyo moo i wi laco-ni. Man aye gin ma onongo con kitimo i kom ngat mo me nyuto ni kiyero en me bedo kabaka. Jehovah owaco bot Camuel me onyo moo-ni i wi Caulo. Eni obedo moo ma dok pat ma ngwece kur adada.

Caulo onongo tamo ni en pe eber me bedo kabaka. En owaco bot Camuel ni: ‘An aa ki i kaka me Benjamin, ma en aye tidi loyo ki i Icrael. Pingo iwaco ni an abibedo kabaka?’ Jehovah mito Caulo pien en pe kete ni edit nyo ni en pire tek. Meno aye gin mumiyo En oyere me bedo kabaka.

Ento Caulo pe obedo lacan nyo laco matidi. En a ki i ot mulony, dok en laco mabor, ma mwonya. En onongo bor kato ngat mabor loyo i Icrael ki futi acel! Caulo dwir tutwal, dok en obedo laco matek adada. Lwak cwinygi obedo yom ni Jehovah oyero Caulo me bedo kabaka. Gin ducu gucako dange ni: ‘Kabaka obed kwo nakanaka!’

Lukwor pa Icrael onongo pud gitek calo kit ma con ca. Gin pud giyelo Luicrael tutwal. Cutcut ka kiketo Caulo me doko kabaka, jo Ammon gubino ka lweny i komgi. Ento Caulo ocoko lumony mapol, ci en oloyo jo Ammon ki lweny. Man omiyo lwak igi obedo yom ni Caulo aye obedo kabaka.

Ka mwaka woto ki kato, Caulo otelo wi Luicrael me loyo lweny mapol i kom lukworgi. Caulo bene onongo tye ki wode ma cwinye tek ma nyinge Yonacan. Dok Yonacan okonyo Icrael me loyo lweny mapol. Lupiliciti aye pud gubedo lukwor pa Luicrael marac loyo. I nino mo acel Lupiliciti alip ki alip gubino ka lweny ki Luicrael.

Camuel owaco ki Caulo ni kong okur nio wang ma ebino emiyo gitum nyo mot, bot Jehovah. Ento Camuel tye ka galle. Caulo olworo ni Lupiliciti bicako lweny woko, pi meno en omiyo gitum woko en kikome. Lacen i kare ma Camuel obino, en owaco ki Caulo ni en pe obedo lawiny. Camuel owaco bote ni: ‘Jehovah biyero ngat mukene me bedo kabaka me Icrael.’

I ngeye lacen Caulo doki pe obedo lawiny aye. Pi meno Camuel owacce ni: ‘Ber me winyo Jehovah makato miyo romo maber ma loyo bote calo mot. Pien in pe iwinyo Jehovah, Jehovah pe biye ni imedde me bedo kabaka me Icrael.’

Watwero nongo pwony maber ki i gin man. Nyutiwa kit ma pire tek kwede me winyo Jehovah kare ducu. Dok bene, nyuto ni ngat ma kite ber, calo kit ma Caulo kong obedo kwede, twero lokke doko marac. Wan pe wamito ni wadok marac, pe kumeno?

1 Camuel cura 9 nio wa i 11; 13:5-14; 14:47-52; 15:1-35; 2 Camuel 1:23.