Maana 56nan

Saul ye Israɛl masakɛ fɔlɔ ye

I ƝƐ bɛ Samuɛl la ka tulu bɔn cɛ kunkolo kan wa? Nin de bɛ kɛ ni mɔgɔ dɔ tara ka kɛ masakɛ ye. Jehova y’a fɔ Samuɛl ye ko a ka tulu bɔn Saul kunkolo kan. Tulu kɛrɛnkɛrɛnnen kasa duman dɔ don.

Saul tun t’a miiri ko ale ka ɲi fo ka se ka kɛ masakɛ ye. A ko Samuɛl ma: ‘Ne bɛ bɔ Benjamɛn ka kabila de la. Ne ka kabila ka dɔgɔ ni Israɛl kabila bɛɛ ye. Mun na e b’a fɔ ko ne bɛna kɛ masakɛ ye?’ Saul kodiyara Jehova ye, bawo a tun t’a yɛrɛ filɛ mɔgɔba ye. O kosɔn Jehova y’a ta ka kɛ masakɛ ye.

Nka, Saul tun tɛ faantan ye. Mɔgɔ gansan fana tun tɛ. A tun bɛ bɔ nafolotigi du de kɔnɔ. A tun cɛ ka ɲi. Cɛ jan tun don, bawo mɔgɔ tɔw bɛɛ tun bɛ dan a kamakun na. A tun ka teli kosɛbɛ senna boli la. Fangaba tun b’a la. Israɛlkaw nisɔndiyara kosɛbɛ, bawo Jehova ye Saul de ta ka kɛ u ka masakɛ ye. U bɛɛ ko: ‘Masakɛ ka si sɔrɔ badaa-badaa!’

Fanga bɛ Israɛl juguw la kosɛbɛ halisa. U bɛ tɔɔrɔ caman lase Israɛlkaw ma. Saul kɛlen kɔ masakɛ ye, waati dɔɔnin dɔrɔn o kɔfɛ, Amɔn ka jamakulu nana Israɛlkaw kɛlɛ. Nka Saul ye sɔrɔdasikuluba lajɛ ka Amɔn ka jamakulu kɛlɛ. Israɛlkaw sera u la. O kosɔn, jama nisɔndiyara kosɛbɛ ko Saul ye u ka masakɛ ye.

Sanw kɔnɔna na, Saul ye Israɛlkaw ɲɛminɛ kɛlɛw la, ka se u juguw la siɲɛ caman. Denkɛ dɔ tun bɛ Saul bolo min tɔgɔ ye ko Jonatan. A ja tun ka gɛlɛn . Ale fana ye Israɛl dɛmɛ ka se u juguw la kɛlɛ caman na. Nka, Filisitikaw de tun ye Israɛlkaw juguw bɛɛ la belebele ye. Don dɔ la, Filisitika ba caman nana Israɛlkaw kɛlɛ.

Samuɛl y’a fɔ Saul ye ko Saul ka a makɔnɔ fo ale ka na ka saraka bɔ Jehova ye. Nka, Samuɛl mɛnna a ma na. Saul siranna Filisitikaw kana kɛlɛ daminɛ. O la sa, Saul yɛrɛ wulila ka saraka bɔ Jehova ye. A tilalen kɔ, Samuɛl nana. Samuɛl y’a fɔ Saul ye ko a ma Ala ka kuma  mɛn. Samuɛl ko: ‘Jehova bɛna mɔgɔ wɛrɛ ta ka kɛ masakɛ ye Israɛl kunna.’

O kɔfɛ Saul ma Ala ka kuma mɛn tuguni. Samuɛl y’a fɔ Saul ye ko: ‘Ka Jehova ka kuma mɛn, o ka fisa ka saga ɲumanw bɔ saraka ye. Ikomi i ma Jehova ka kuma mɛn, Jehova tɛna i to masaya la tun Israɛl kunna.’

An bɛ se ka kalan ɲɛnama sɔrɔ nin maana na. A b’a jira an na ko a nafa ka bon kosɛbɛ an ka Jehova ka kuma mɛn tuma bɛɛ. Saul ka maana b’a jira an na fana ko mɔgɔ ɲuman bɛ se ka yɛlɛma ka kɛ mɔgɔjugu ye. An t’a fɛ abada an ka laban ka kɛ mɔgɔjugu ye. O tɛ tiɲɛ ye wa?

1 Samuɛl tilayɔrɔba 9 ka na 11;13:​5-14; 14:​47-52; 15:​1-35; 2 Samuɛl 1:⁠23.