TAN-AWA si Samuel nga nagbubo ug lana sa ulo sa tawo. Kini maoy ilang sagad gibuhat sa pagpakita nga ang usa ka tawo gipili ingon nga hari. Si Jehova nagsugo kang Samuel sa pagbubo sa lana sa ulo ni Saul. Kini maoy talagsaon mahumot nga lana.

Si Saul wala maghunahuna nga siya maayo aron mahimong hari. Si Jehova nakagusto kaniya, tungod kay wala siya magpakaaron-ingnon nga dako ug hinungdanon. Kana maoy hinungdan nga siya nagpili kaniyang mahimong hari.

Apan si Saul nagagikan sa usa ka adunahang pamilya, ug siya ambongan kaayo ug taas. Siya usab kusog modagan ug kusgan kaayo. Ang katawhan nalipay nga si Jehova nagpili kang Saul nga mahimong hari. Silang tanan misugod sa pagsinggit: ‘Mabuhi ang hari!’

Ang mga kaaway sa Israel nagpadayon gihapon sa pagpahinabo ug daghang kasamok. Sa wala madugay human si Saul nahimong hari, ang mga Ammonitas misulong sa pakig-away batok sa Israel, apan si Saul mitigom sa usa ka dakong kasundalohan ug nagmadaogon kanila. Ang katawhan malipayon nga si Saul nahari.

Sa pagpanlabay sa mga tuig, si Saul nangulo sa mga Israelita sa daghang kadaogan. Si Saul usab may maisog anak lalaki nga ginganlan si Jonathan. Ug si Jonathan nagtabang sa Israel nga modaog sa daghang mga gubat. Usa ka adlaw mga linibo sa mga linibo ka Pelistihanon misulong sa pakiggubat batok sa mga Israelita.

Si Samuel nagtugon kang Saul sa paghulat hangtod siya moabot ug maghimog usa ka halad, o gasa kang Jehova. Apan si Samuel nalangan sa pag-abot, ug si Saul nahadlok nga ang mga Pelistihanon moatake. Busa siya naghimo sa halad mismo. Sa dihang si Samuel nahitungha sa kataposan, iyang gisultihan si Saul nga siya nahimong masinupakon ug nga si Jehova magpilig laing tawo nga maghari ibabaw sa Israel.

Sa ulahi si Saul misupak na usab, busa si Samuel misulti kaniya: ‘Labing maayo ang pagsugot kang Jehova kay sa paghimog usa ka maayong gasa kaniya. Tungod kay wala ka magsugot kang Jehova, si Jehova dili mopabilin kanimo ingon nga hari sa Israel.’

Makita ta gikan niini nga kinahanglan kitang mosugot kanunay kang Jehova. Usab, atong nakita nga ang usa ka maayong tawo, sama kang Saul, mahimong mausab ug mahimong daotan. Dili gayod kita gustong mahimong daotan, dili ba?