SAMUEL nih mipa pakhat a lu cung ah chiti a toih hi zoh hmanh u. Mi pakhat cu siangpahrang caah thim a sinak hmuhsak awk ah hi baktuk in an rak tuah tawn. Jehovah nih Samuel cu Saul lu cung ah chiti toih awk ah a chimh. Cu chiti cu a hmui mi chiti phun dang a si.

Saul nihcun siangpahrang si awk ah kaa tlak lo tiah a rak ruah. ‘Keimah cu Israel phun lak i a hme bik mi Benjamin hrin pei ka si ko cu. Zeicah siangpahrang na si lai, na ka ti?’ tiah Samuel kha a rak ti. Saul cu a ruam a kai lo i aa porhlawt lo caah Jehovah nih a rak duh. Cucaah amah cu siangpahrang ah a rak thim mi a si.

Sihmanhsehlaw Saul cu mi sifak le mi hmete cu a rak si lo. A rum ngai mi innchungkhar chung in a chuak mi a si i, a dawh zong aa dawh ngai i, mi khan sang pakhat a si. Israel ram chung mi vialte nak in peekhat in a sang deuh! Saul cu tlik zong a ṭhawng ngai i, a thazang zong a ṭhawng ngai. Jehovah nih Saul kha siangpahrang ah a thimpiak hna caah mi hna cu an i lawm ngai ngai. An zapi tein: ‘Siangpahrang cu a nun khua sau ko seh!’ tiah an au.

Israel mi an ral hna cu hmasa bantuk in an ṭhawng rih ko. Israel mi hna caah harnak tampi zong an chuahter rih ko. Siangpahrang ah Saul kha an ser hnu tlawmpal ah, Ammon mi hna cu anmah doh awk ah an hung chuak. Sihmanhsehlaw Saul nih ralkapbu nganpi kha a pumh hna i, Ammon mi hna cu a tei dih hna. Mah nihcun Saul siangpahrang a si kha an lung a lawmhter hna.

Kum le caan a hung dih lengmang tik ah, Saul nih Israel mi hna cu a hruai hna i an ral hna cung ah teinak tampi an hmuh. Saul cu a ral a ṭha ngai mi fapa pakhat Jonathan an ti mi zong a rak ngei. Jonathan nihcun Israel mi hna an ral dohnak tei awk ah a tampi a rak bawmh ve hna. Filistin mi hna cu Israel miphun an ral ṭhalo bik an si rih ko. Nikhat cu Filistin mi thong tampi cu Israel doh awk ah an hung chuak.

Samuel nih Saul cu amah a rat i Jehovah sin ah thawinak maw pekchanhnak maw tuah hlan tiang hngah rih ko awk ah a rak chimh. Sihmanhsehlaw Samuel cu hnu deuh ah a rak ra. Saul cu Filistinmi nih raldohnak an thok cang rua ti a rak phang i, cucaah a va kal i, thawinak cu amah nih a tuah, A donghnak ah Samuel a rat tik ah, Saul cu nawl ngai lo mi a si kha a chimh. ‘Jehovah nih mi dang pakhat kha Israel miphun cung i siangpahrang ṭuan ding ah a thim cang lai,’ tiah Samuel nih a ti.

A hnu ah Saul cu nawlbia a rak ngai ṭhan hawi lo. Cucaah Samuel nih: ‘Jehovah a bia ngai cu a ṭha bik mi tuu laksawng peknak in a ṭha deuh. Jehovah a nawlbia na ngaih lo caah nangmah cu Israel siangpahrang ah Jehovah nih an hmang ti lai lo,’ tiah a chimh.

Hi thawng in fimnak ṭha pakhat kan i lak khawh. Jehovah a nawlbia kha ngaih zungzal awk ah zei tluk biapi dah a si ti a kan hmuhsak. Cun Saul bantuk miṭha pakhat zong an i thleng i mi ṭhalo ah an cang kho ti a langhter. Kan nih cu zeitikhmanh ah mi ṭhalo si cu kan duh lo, a si lo mei?