GET Samyel pe vid delwil lo latet sa zonm. Se sa ki zot ti abitye fer avek en dimoun pour montre ki i’n ganny swazir konman lerwa. Zeova ti’n demann Samyel pour vid delwil lo latet Sail. I en delwil spesyal, i santi bon.

Sail ti panse ki i pa merit vin lerwa. ‘Mon sorti dan tribi Benzamen, sa enn pli pti an Izrael,’ i ti dir Samyel. ‘Akoz ou dir ki mon pou vin lerwa?’ Zeova ti kontan Sail akoz i pa ti fer krwar ki i ti gran e enportan. Se pour sa rezon ki Zeova ti swazir li pour vin lerwa.

Me Sail pa ti en dimoun pov, e i pa ti pti pti. I ti sorti dan en fanmiy ris, i ti en zoli garson, i ti pli gran ki lezot Izraelit. Sail ti kapab tay vit osi, e i ti en zonm for. Bann dimoun ti vreman kontan ki Zeova ti’n swazir Sail pour vin lerwa. Zot tou zot ti kriye: ‘Viv lerwa!’

Bann lennmi Izrael ti vin pli for ki avan. Zot ti pe kontinyen fer en kantite problenm avek bann Izraelit. Apre ki Sail ti’n vin lerwa, bann Amonit ti vin lager kont zot. Me Sail ti rasanble en gran larme, e i ti ranport laviktwar lo bann Amonit. Sa ti fer bann dimoun kontan ki Sail ti lerwa.

Anmezir ki bann lannen ti pase, Sail ti fer bann Izraelit ranport en kantite laviktwar lo zot bann lennmi. Sail ti osi annan en garson brav, ki ti apel Yonatann. Yonatann ti ed Izrael pour ranport en kantite lager. Bann Filisten ti ankor pli move lennmi bann Izraelit. En zour, en kantite Filisten ti vin lager kont bann Izraelit.

Samyel ti demann Sail pour esper li vin ofer en sakrifis oubyen ofer en kado avek Zeova. Me Samyel ti tarde vini. Sail ti per ki bann Filisten pou konmans lager, alor i ti ofer sa sakrifis limenm. Finalman kan Samyel ti arive, i ti dir avek Sail ki i ti’n dezobei. ‘Zeova pou swazir en lot dimoun pour vin lerwa Izrael,’ Samyel ti dir.

Plitar Sail ti dezobei ankor. Alor Samyel ti dir avek li: ‘I pli bon pour obei Zeova ki pour ofer li en kado, en pli bon mouton. Akoz ou pa’n obei Zeova, I pa pou gard ou konman lerwa Izrael.’

Nou kapab aprann en bon leson atraver sa. I montre nou konman i enportan pour toultan obei Zeova. I osi montre nou konman ki en bon dimoun parey Sail ti ete i kapab sanze e vin en move dimoun. Nou pa ti a kontan vin pa bon nou osi, pa i vre?