SAMUEL be dagge, we massered nonogi aceite eyonaid. Ebbennegi weyob imagdamala, oyogega we dule reyg onugsalesye. Samuelga Jehová soge, Saúl e nonog aceite eyogoye. We aceite yogasaaled suli, yeer yabbanne.

Saúldi binsae e dina gwen reyg guedsulinye. Wegi Samuelga soge: ‘Andi Benjamín neggwebur sordad, Israel neggwebur nabbi bibbigwadi. Degid, ¿ibigala be anga sogsunna, an reyg guoedye?’. Jehová nued Saúl dagge, ar dummarba guedgi binsasulidbali. Agala onugsasa reyg megega.

Auggi Saúl dule wilegedsuli, geb dule maddugwadsur bali. Saúl, gwenadgan mani ibgangi daniggi, geb dule yeerdagleged gubali, degine, dule yaibagwad bali. ¡Dulemar bamaladi e gugginse unnila owarmagmala! Saúl anba yeer abarmagbali, geb dule yeer gangued gubali. Dulemar yeeriddoge Jehová, Saúl onugsasgua reyg megega. Bela binnasur goddemalad: ‘¡Biddiggi rey undar gudigusan gadinye!’.

Israel neggwebur e isdarmalad anba yeer gangu aa unni bugmala. Saúl reyg onugsalesad sorba, Amón dorgana Israelgi agnaggwiali. Auggi Saúl sorda buggib onmasmoga, geb Amón dorgan galaggusmala. Degsoggu, neggwebur yeeriddosa, Saúl reyg gumaidba.

Birgamar nanamai gusa, geb Saúl Israel dulemar idumai gusa e isdarmaladgi obinedgi. Saúl massi wargwen nigga, we massi dobed sulidi, Jonatánye nuga. Geb Jonatán anba Israel bendasmoga e isdarmaladgi obinmalaga. Aunni anba Filistea dorgana bur Israel neggwebur e isdarmalad sunsogmaladi. Ibagwengi, miliba miliba mergu Filistea dorgana duurmaggali Israel neggweburgi.

Samuel, Saúlga soge e dagedse e edarboye, geb sorbali Jehová gala ed ibdula oburgoye. Auggi, Samuel yoggude. Saúl dobe iddoge, abaggar Filistea dorgana urwed onodmalale, degsoggu Saúl bar edarbissuli, e wargwengi Jehová gala na ibmar oburgwissunna. Degi, nabbis Samuel nonigua, Saúlga sognoniggi, be ibmar soglesadba imassurye. Ega soge: ‘Jehová, dule baid onugsaoe Israelgi reyg megega’.

Sorba, gannar Saúl ega ibmar soglesadba imassurbali. Emisgi Samuel ega soge: ‘Jehová sogedba ibmar imaggedi bur nuedi, bur ega oveja nuegan uggedba. Ar Jehová sogedba be ibmar imassur soggu, bar Israel reyg be megosuli’.

Wegine ibmar nued anmar durdagge. Anmar odurdagge, Jehová sogedbarbii ibmar imaggedi bur ibmar biriginedye. Anba anmar odurdagbali, dule wargwen nued daele nabir anba dule isganaga gumoye, ar igi Saúl gusa. ¡Biddiggi anmardi deyob gussulin gadina! ¿insoa?