PIIRAKAA nümüin Samuel oʼyotushi seita saaʼu nikii chi wayuukai. Aainjünüsü tia nümüin wayuu eeka nüneekünüin süpüla aluwatawaa. Nuluwataain Jeʼwaa Samuel sünain oʼyotoo seita jemeta eejuulu saaʼu nikii Saúl.

Naashin Saúl nnojoishi anain süpüla aluwatawaa. Nümaka nümüin Samuel: ‹Nüpüshi taya Benjamín, palitchon waya. ¿Jamüshi taluwataainjachika paashin?› Talatüshi Jeʼwaa nümaa Saúl süka nnojoluin yaletüin naaʼin, nuluwataaka nutuma.

Nnojoishi wayuuin müliashi Saúl otta nnojoishi nia motsochoin. Washirü nüpüshi, anashichon maʼin sümaa miyoʼusenuuin noulia na israeliitakana. Kawachirashi otta katchinshi maʼin nia. Talatüshii na wayuukana süka nüneeküin Jeʼwaa Saúl süpüla aluwatawaa. Namaka sümaa naʼwaatüin: ‹¡Kojutu watuma chi aluwataaikai!›

Ayatüshii jashichin maʼin naʼünüü na israeliitakana. Nuluwataapa Saúl, atkaashii na ammoniitakana namaa na israeliitakana. Nakanajuuka nutuma Saúl otta na nümaajanakana. Talataka maʼin na wayuukana süka nuluwataain Saúl.

Kakalia Saúl sünain nükanajirüin na israeliitakana otta nükaaliinjüin nia Jonatán chi nüchonkai. Soʼu wanee kaʼi nashutaka na filisteokana naaʼu na israeliitakana süka ayatüin naʼünüüin naya.

Aʼatapajünajachi Samuel nutuma Saúl süpüla naʼajüin mürüt nümüin Jeʼwaa. Kamaʼaka Samuel. Süka mmoluin Saúl seema nashutuin na filisteokana, naainjaka tü naainjüinjatkat Samuel. Nüntapa Samuel nümaka nümüin Saúl: ‹Nüneekeechi Jeʼwaa wanee wayuu naata süpüla nuluwataain naaʼu na israeliitakana süka nnojoluin poonooin nümüin›.

Mapa nnojoika jaa nümüin Saúl nüchikuaʼa, nümaka Samuel: ‹Anasü oonowaa nümüin Jeʼwaa suulia asülajaa nümüin saʼanasia anneerü. Süka nnojoluin poonooin nümüin Jeʼwaa, nnojoleechi pia aluwataain naaʼu na israeliitakana›.

Tüü, shikirajüin waya anain maʼin oonowaa waneepia nümüin Jeʼwaa otta müsia eein süpüla mojulaajaain wanee wayuu anashi maʼaka naaʼin Saúl. ¡Nnojo waainjüin tia!