Kukwe kira 56

Saúl rei kena Israel

SAMUEL tä aseite keke ni iti dokwäbiti mike ñärärä. Ne nuain nämene nitre dianka nämene reire bämikakrä. Samuel käkwe aseite kekadre Saúl dokwäbiti Jehová niebare ie. Aseite ye ütiäte aune rä mane.

Saúl ie ja ñan namani ruin kwin rabakäre reire. ‘Ti abokän kite nitre Benjamín juta bäri chi Israel yekri,’ niebare kwe Samuel ie. ‘¿Ñobätä ti rabai reire nieta mäkwe?’ Saúl töi ñan nämene bikabätä kri aune ütiäte, yebätä namani tuin kwin Jehovai. Yebätä dianinkä kwe reire.

Akwa Saúl ye ñan ni chi aune bobre. Niara mräkätre ngwian bökäne kri aune niara bä nuäre krubäte bätä nga kwin. ¡Niara ye bäri kri nitre mada Israel yekrä! Saúl ye ni niaka kwin aune dite kri arato. Jehovakwe Saúl mikani reire ye käi namani juto nitrebätä. Nitre jökrä namani niere ja dibiti: ‘¡Rei mä nüna jankunu!’

Nitre Israel rüe ye nämene dite. Saúl mikani reire ye bätäräbe nitre Amón nikani rüre niaratre ben. Akwa Saúl käkwe nitre rükä ükaninkrö kwati, aune nitre Amón ganainbare kwe. Saúl nämene reire ye käi namani juto nitrebätä.

Kä nikani kabre ta yete, Saúl nitre Israel jie ngwani rüe kwati ganainne. Saúl monsoi Jonatán yebätä kä jürä ñaka arato. Jonatán käkwe Israel dimikani rüe kwati ganainne. Nitre filisteo ye Israel rüe bäri käme. Bati nitre filisteo kwati krubäte jatani rüre Israel ben.

Samuel rükaita ye ngwane jondron kukwai kwe Jehovai, ye abokän Saulkwe ngübadre niebare kwe ie. Akwa Samuel namani ngrötöte. Nitre filisteo jatai rüre nitre Israel ben namani ruin Saúl ie, yebätä niarakwe jondron kukwani akwle Jehovai. Samuel nükaninta ye ngwane, Saúl käkwe ñaka niara mikani täte niebare kwe ie. Samuel niebare: ‘Jehovakwe ni mada mikai reire Israel.’

Saúl ñaka niara mikani täte bobukäre. Samuel niebare ie: ‘Jehová mikadre täte ye bäri ütiäte obeja bäri kwin biandre ie yekrä. Ñobätä ñan aune mä ñaka Jehová mikani täte, yebätä niara käkwe ñaka mä tuainmetre reire jankunu Israel.’

Nete kukwe ütiäte mikata gare ja tökrä nie. Tä mike gare nie, Jehová mikadre täte käre ye bäri ütiäte. Ne madakäre, ni töi kwin Saúl ye erere, töi raba nikwite käme arato. ¡Ni ñaka ja ngwandre ye erere! ¿ñan ererea?

1 Samuel kapitulo 9-11; 1 Sam 13:5-14; 14:47-52; 15:1-35; 2 Samuel 1:23.