Saul, ombara ondenga yaIsrael
EHUNGI 56
Saul, ombara ondenga yaIsrael
TARA Samuel ma tirire omaze kotjiuru tjomurumendu ngo. Owo aave tjiti nao komundu okuraisa kutja eye wa toororwa otja ombara. Jehova wa raera Samuel kutja nga tirire omaze kotjiuru tjaSaul. Oyo omaze wapeke womoro omuwa.
Saul kena pe ripura kutja eye omundu omusemba okurira ombara. Eye wa raera Samuel: ‘Ami mba za momuhoko waBenjamin, omuṱiṱiṱiṱi mu Israel, omena ratjike ove tji mo tja ami me rire ombara?’ Jehova wa suverere Saul mena rokutja kena pe riraisa kutja omundu omunene nomusemba. Mena ranao Eye opa zokumutoorora okurira ombara.
Nungwari Saul kamundu omuṱiṱi poo omusyona. Eye wa za meṱunḓu etumbe, nu eye omurumendu omure, womuhapo omuwa tjinene. Eye wa ri omure pOvaisrael avehe! Saul wina wa ri omutupuke wakatjoruhonga nu eye omurumendu omunamasa tjinene. Otjiwaṋa tja ri nenyando indu Jehova tja toorora Saul okurira ombara. Owo avehe va ravaera nave tja:‘Ombara ngai hupe orure!’
Ovanavita vaIsrael va ri nomasa tjinene kombanda yawo. Owo aave yandja ouzeu tjinene kOvaisrael. Tjimanga kombunda yaindu Saul tja rira ombara, Ovaamoni ve ve sekamena. Nungwari Saul wa woronganisa otjimbumba otjinene tjovita, nu eye wa taara otjirwa kuna Ovaamoni. Ihi tja nyandisa otjiwaṋa omitima indu Saul tja rira ombara.
Otja ozombura tjaaze kayenda, Saul wa hongorera po Ovaisrael momataarero wovita ovingi kuna ovanavita vawo. Saul wina wa ri nomuzandu ependa wena Jonatan. Nu Jonatan wa vatera Ovaisrael okutaara ovirwa ovingi. Ovafilisti ngunda omba ri ovanavita vaIsrael ovanenenene. Eyuva rimwe omayovi nomayovi wOvafilisti va sekamena Ovaisrael.
Samuel wa raera Saul kutja e mu undje ngandu tje ya nu ma yandje ombunguhiro, poo otjiyandjewa, ku Jehova. Nungwari Samuel wa womba okuya. Saul aa tira kutja Ovafilisti mave utu otjirwa, mena ranao eye wa kayenda komurungu a tjiti ombunguhiro omuini. Samuel korusenina tje ya, eye wa raera Saul kutja eye ka raisire onḓuviro. Samuel wa tja: ‘Jehova ma toorora omundu warwe okurira ombara yOvaisrael.’
Kombunda Saul ka puratenene rukwao. Mena ranao Samuel wa tja ku ye: ‘Okokuwa okukara nonḓuviro ku Jehova komurungu wokumutjitira ombunguhiro yonḓu osembasemba. Mena rokutja kawa ri nonḓuviro ku Jehova, Jehova kena ku kuṱiza otja ombara yaIsrael.’
Eṱe matu yenene okurihongera ko ehongwa ewa okuza kehungi ndi. Oro mari tu raisire kutja otjiṋa otjinanḓengu okukara nonḓuviro ku Jehova aruhe. Oro wina mari tu raisire kutja omundu ngwa ri omuwa, tjimuna Saul tja ri, mape ya a runduruka okurira omuvi. Eṱe kamaatu vanga okurira ovandu ovavi.
1 Samuel ekondwa 9 ngandu ko 11; 13:5-14; 14:47-52; 15:1-35; 2 Samuel 1:23.
