TAQSIṬ TIS 56

Agellid amezwaru n Isṛayil

MUQEL Camwil m’akka yesmaray zzit ɣef uqerru n wergaz-​agi. D ayen i xeddmen zik akken ad sseknen i walbeɛḍ belli yeţwaxtaṛ akken ad yuɣal d agellid. Yahwa yumeṛ i Camwil ad yesmir zzit ɣef uqerru n Cawul. Zzit-​agi i gessexdem temxalaf ɣef tiyaḍ yerna tesɛa rriḥa yelhan.

Cawul ur yumin ara belli yuklal ad yili d agellid. Yenna i Camwil: ‘Nekk lliɣ si lɛeṛc n Binyamin, lɛeṛc akk mecṭuḥen ger leɛṛac n Isṛayil. Acimi ihi i yi-​d-​teqqareḍ ad iliɣ d agellid?’ Yahwa iḥemmel Cawul axaṭer ur iḥsib ara iman-​is d amdan meqqren. Ɣef waya i t-​yextaṛ Yahwa ad yili d agellid.

Lameɛna Cawul ur yelli ara d igellil neɣ d argaz ur nesɛi tissas. Yekka-​d si twacult yesɛan ttrika, yecbeḥ yerna yesɛa lqedd. Ulac win iɛeddan nnig tayeţ-​is di tmurt n Isṛayil! Cawul yella diɣen d win iḥeṛcen di tazzla yerna yesɛa lǧehd ameqran. At Isṛayil feṛḥen imi i t-​yextaṛ Yahwa ad yili d agellid. Bdan ţɛeggiḍen, qqaren: ‘Ad yidir ugellid!’

Iɛdawen n wat Isṛayil mazal-​iten ǧehden nezzeh. Ţqehhiren-​ten daymen. Akken kan yuɣal Cawul d agellid, At Ɛamun usan-​d ad nnaɣen nutni d wat Isṛayil. Lameɛna Cawul ijmeɛ-​ed aṭas n iɛsekṛiwen, dɣa yeɣleb At Ɛamun. Agdud yella di sseɛd ameqran imi yella Cawul d agellid fell-​as.

Iseggasen ţɛeddin wa deffir wa, Cawul yeţţawi At Isṛayil ad rebḥen aṭas n lgirrat ɣef yeɛdawen-​nsen. Cawul yesɛa yiwen mmi-​s iẓewren nezzeh yeţţusemman Yunatan. Yunatan iɛawen At Isṛayil ad rebḥen aṭas n lgirrat. Ifilistiyen mazal-​iten d iɛdawen imezwura ger yeɛdawen meṛṛa n Isṛayil. Yiwen wass, d luluf i d-​iṛuḥen ad nnaɣen d wat Isṛayil.

Camwil yumeṛ i Cawul a t-​yeṛǧu alamma yewweḍ-​ed, ssyin Camwil ad yefk asfel neɣ tikci i Yahwa. Lameɛna Camwil iɛeṭṭel ur d-​yuɣal ara. Imi yugad Cawul a d-​ẓedmen fell-​asen Ifilistiyen, yezwar zdat n wegdud, dɣa yefka asfel-​nni s yiman-​is. Mi d-​yelḥeq Camwil, ilumm agellid Cawul imi ur yuɣ ara awal. Yenna-​yas: ‘Yahwa ad yextiṛ argaz nniḍen ara yilin d agellid ɣef Isṛayil.’

Iɛedda kra n lweqt, Cawul iɛuṣa Ṛebbi tikkelt nniḍen. Camwil yenna-​yas ihi: ‘Tiɣin n wawal i Yahwa tif tikci n wakraren yelhan. Imi ur s-​tuɣeḍ ara awal, Yahwa ur k-​iţţaǧǧa ara aţ-​ţeqqimeḍ d agellid n Isṛayil.’

Nezmer a nestenfeɛ mliḥ s teqsiṭ-​agi. Tessken-​aɣ-​d acḥal tesɛa azal tiɣin n wawal i Yahwa. Tessken-​aɣ-​d diɣen belli lɛebd, ɣas yelha, yezmer ad yuɣal d amcum am Cawul. Mebla ccekk ur nebɣi ara a nuɣal d yir lɛibad!

1 Camwil ixef wis 9 alamma d wis 11; 13:5-14; 14:47-52; 15:1-35; 2 Camwil 1:23.