Ngewa ya 56: Saulo—Mũsumbĩ wa Mbee wa Isilaeli
KWASISYA Samueli ayĩtĩkĩsya mũtwe wa mũndũ ũũ mauta. Ũu nĩw’o meekaa mũndũ nĩ kana monany’e kana nĩwanyuvwa atw’ĩke mũsumbĩ. Yeova eeie Samueli nĩetĩkĩsye mũtwe wa Saulo mauta. Maĩ mauta ma mwanya manyungaa nesa.
Saulo ndasũanĩaa kana nĩwaĩle kũtw’ĩka mũsumbĩ. Kwoou amwĩa Samueli: ‘Nyie nĩ wa mbaĩ ya Mbenyamini, ĩla nini vyũ nthĩnĩ wa Isilaeli. Nĩkĩ ũkwasya nĩngũtw’ĩka mũsumbĩ?’ Yeova amwendie Saulo kĩtumi nũndũ ndeetusaa ta mũnene kana ta wa vata mũno. Kĩu nĩkyo kĩtumi kya Kũmũnyuva atw’ĩke mũsumbĩ.
Ĩndĩ Saulo ndaĩ mũndũ ngya kana mũnini. Aumĩte mũsyĩ mũthwii, na aĩ mũndũ mũmbe nesa mũno na mũasa. Aĩ mũasa vyũ kũthonoka andũ onthe ma nthĩ ya Isilaeli! Na ĩngĩ Saulo aĩ mũsembi wĩ mĩtũkĩ, na mũndũ wĩ vinya mũno. Andũ maĩ na ũtanu nũndũ Yeova nĩwanyuvie Saulo atw’ĩke mũsumbĩ. Na onthe mambĩĩa kũneena na wasya mũnene mayasya: ‘Mũsumbĩ nĩekale thayũ ĩvinda ĩasa!’
Amaitha ma Isilaeli maĩ na vinya o ta tene. Maendee o na kũthĩny’a Aisilaeli. O ĩvinda ĩkuvĩ ĩtina wa Saulo kũtuwa mũsumbĩ, Aamimoni nĩmambatie moke kũkita na Aisilaeli. Ĩndĩ Saulo oombany’a nguthu nene ya ita, na amasinda. Ũndũ ũsu watumie andũ mew’a mũyo nĩkwĩthĩwa Saulo nĩwe mũsumbĩ.
Nthĩnĩ wa myaka ĩla yaatĩĩe, Saulo nĩwatongoeisye Aisilaeli masinda amaitha moo mavinda maingĩ. Na ĩngĩ Saulo aĩ na mwana ngũmbaũ weetawa Yonathani. Yonathani nĩwatetheeisye Aisilaeli kũsinda makaũ maingĩ. Kũvika ĩvinda yu Avilisiti nĩmo maĩ amaitha ala athũku vyũ ma Aisilaeli. Mũthenya ũmwe Avilisiti ngili mbingĩ nĩmookie kũkita na Aisilaeli.
Na Samueli eea Saulo nĩeteele nginya oke na kũthemba, kana kũmũnenga Yeova mũthĩnzĩo. Ĩndĩ Samueli ndaaũka na mĩtũkĩ. Nake Saulo akwatwa nĩ w’ĩa ayona Avilisiti ta mekwambĩĩa kaũ. Kwoou we mwene aumya nthembo ĩsu. Yĩla Samueli wesie kũvika, amũtavya Saulo kana nũvĩtĩtye na amwĩa, ‘Yeova nũkũnyuva mũndũ ũngĩ atw’ĩke mũsumbĩ ĩũlũ wa Isilaeli.’
Ĩtina Saulo nĩwavĩtisye ĩngĩ. Kwoou Samueli amwĩa: ‘Nĩ kava kũmwĩw’a Yeova kwĩ kũmũthembea malondu ala maseo vyũ. Nũndũ ndũnamwĩw’a Yeova, Yeova nake ndekũeka ũendee kw’ĩthĩwa wĩ mũsumbĩ wa Isilaeli.’
Nĩtũtonya kwĩmanyĩsya ĩsomo ĩseo kuma ũndũnĩ ũũ. Wĩtwony’a kana nũndũ wa vata mũno kũmwĩw’a Yeova mavinda onthe. Na ĩngĩ, wĩonany’a kana o na mũndũ mũseo, ta ũndũ Saulo wailyĩ, nũtonya kũalyũka na kũtw’ĩka mũthũku. Ithyĩ tũikwenda nongi kwĩsa kũtw’ĩka athũku, kana no twende?
1 Samueli kĩlungu kya 9 nginya 11; 13:5-14; 14:47-52; 15:1-35; 2 Samueli 1:23.
Makũlyo
- Nthĩnĩ wa visa ũũ, Samueli eĩka ata, na nĩkĩ?
- Mwana wa Saulo eetawa ata, na mwana ũsu eekie ata?
- Nĩkĩ Yeova ũnũkwendeew’a nĩ Samueli, nake nĩ mũndũ wa mũthemba mwaũ?
- Nĩkĩ Saulo waumisye nthembo vandũ va kweteela Samueli aumye?
- Nĩ ĩsomo yaũ tũtonya kwĩmanyĩsya kũmana na Ngewa ya Saulo?
Makũlyo ma kwongeleela
- Soma 1 Samueli 9:15-21 na 10:17-27.
Kwĩnyivya kwa Saulo kwamũtetheeisye ata ndakeke ũndũ atambĩte kwĩsilya yĩla aũme amwe maneenie ĩũlũ wake kwa kĩvũthya? (1 Sam. 9:21; 10:21, 22, 27; Nth. 17:27)
- Soma 1 Samueli 13:5-14.
Saulo eekie naĩ yĩva e Ngilikali? (1 Sam. 10:8; 13:8, 9, 13)
- Soma 1 Samueli 15:1-35.
Nĩ naĩ yĩva ngito ĩla Saulo weekie ĩkonanĩtye na Akaki, mũsumbĩ wa Aamaleki? (1 Sam. 15:2, 3, 8, 9, 22)
Saulo atatie ata kũtetea meko make na kwilĩĩla andũ angĩ mavĩtyo make? (1 Sam. 15:24)
Nĩ ũkany’o wĩva twaĩlĩtwe nĩkũatĩĩa ũmũnthĩ yĩla twanengwa ũtao? (1 Sam. 15:19-21; Sav. 141:5; Nth. 9:8, 9; 11:2)
