KʼE REETAL laj Samuel yook xkʼeebʼal aseeyt saʼ xjolom jun li winq. Aʼin nabʼaanumank re xkʼutbʼesinkil naq jun li winq sikʼbʼil ru choʼq awabʼej. Joʼkan naq li Jehobʼa kixye re laj Samuel naq tixkʼe aseeyt saʼ xjolom laj Saul. Li aseeyt aʼin kʼajoʼ xsununkil xbʼook.

Laj Saul kixkʼoxla naq inkʼaʼ truuq chi awabʼejink. Joʼkan naq kixye re laj Samuel: ‹Laaʼin ninchalk saʼ xteepal laj Benjamin. Jwal kachʼin ru linteep chiru xteepebʼ laj Israel. Kʼaʼut nakaaye naq tinkanaaq choʼq awabʼej?› Li Jehobʼa kiwulak chiru xnaʼlebʼ laj Saul, xbʼaan naq moko naraj ta naq tnimaaq xwankil. Joʼkan naq li Jehobʼa kixsikʼ ru choʼq awabʼej.

Laj Saul kʼajoʼ xchʼinaʼusal, najt roq chiruhebʼ laj Israel ut bʼihom. Nawulak chiru aanilak ut wank xmetzʼew. Ebʼ laj Israel keʼsahoʼk saʼ xchʼool naq li Jehobʼa kixsikʼ laj Saul choʼq awabʼej. Joʼkan naq ebʼ laj Israel keʼok xyeebʼal: ‹Sahaq taxaq saʼ xchʼool li awabʼej!›

Ak wank choʼq awabʼej laj Saul naq ebʼ laj Amon kohebʼ chi yalok saʼ xbʼeenebʼ laj Israel. Ebʼ laj Amon toj kawebʼ ribʼ chi yalok. Joʼkan naq laj Saul kixchʼutubʼ naabʼal aj Israel re naq teʼyaloq rikʼinebʼ laj Amon ut us keʼelk. Ebʼ laj Israel sahebʼ saʼ xchʼool naq laj Saul wank choʼq awabʼej.

Chiru naabʼal chihabʼ laj Saul kiwank choʼq awabʼej saʼ xyanqebʼ laj Israel ut us keʼelk saʼ li yalok. Laj Saul kiwank jun ralal, aj Jonatan xkʼabʼaʼ. Laj Jonatan kaw ribʼ chi yalok ut kixtenqʼahebʼ laj Israel chi yalok ut naabʼal sut keʼelk chiʼus. Saʼ jun kutan ebʼ laj Filisteo keʼchalk chi yalok rikʼinebʼ laj Israel xbʼaan naq toj yookebʼ xjosqʼil saʼ xbʼeenebʼ.

Laj Samuel kixye re laj Saul naq t-oybʼeeniiq saʼ li naʼajej Guilgal ut aran tmayejaq laj Samuel chiru li Jehobʼa. Abʼan kibʼayk chaq laj Samuel. Laj Saul kichalk xxiw xbʼaan naq naru nekeʼchalk laj Filisteo chi yalok saʼ xbʼeenebʼ, joʼkan naq kimayejak xjunes. Naq laj Samuel kiwulak rikʼin laj Saul kixye re: ‹Kʼaʼut inkʼaʼ xat-abʼink chiru li Jehobʼa? Anaqwan li Jehobʼa tixsikʼ jun chik li awabʼej re naq t-jolominq saʼ li tenamit Israel!›

Laj Saul kimaakobʼk wiʼ chik. Joʼkan naq laj Samuel kixye re: ‹Jwal loqʼ abʼink chiru li Jehobʼa chiru li mayejak. Xbʼaan naq inkʼaʼ xat-abʼink, li Jehobʼa tatrisi choʼq awabʼej›.

Chixjunil aʼin naxkʼut chiqu naq tento tooabʼinq chiru li Jehobʼa. Naqatzol ajwiʼ naq li chaabʼil xnaʼlebʼ naru naxpoʼ xnaʼlebʼ, joʼ kixkʼul chaq laj Saul. Us raj naq maajunwa tqakʼul aʼan!