TARORA Samueli agĩitĩrĩria mũndũ ũcio maguta mũtwe. Ũũ nĩguo mekaga mũndũ nĩ guo monanie atĩ nĩamũrĩtwo gũtuĩka mũthamaki. Jehova eerire Samueli aitĩrĩrie Saulu maguta mũtwe. Nĩ maguta ma mwanya maatararĩkaga wega mũno.

Saulu ndaigana gwĩciria atĩ no atuĩke mũthamaki wagĩrĩire. Eerire Samueli ũũ, ‘Niĩ ndĩ wa mũhĩrĩga wa Benjamini, ũrĩa mũnini makĩria thĩinĩ wa Isiraeli. Nĩkĩ kĩratũma uuge atĩ nĩ ngũtuĩka mũthamaki?’ Jehova eendire Saulu tondũ ndetuaga mũndũ mũnene na wa bata. Nĩkĩo gĩatũmire amwamũre atuĩke mũthamaki.

No Saulu ndaarĩ mũthĩni kana kamũndũ oro ũguo. Oimĩte thĩinĩ wa famĩlĩ ya itonga, na ningĩ aarĩ mwanake mũthaka ma, na mũraihu. Aarĩ na ũraihu wa buti ĩmwe makĩria ya andũ arĩa angĩ othe thĩinĩ wa Isiraeli! Ningĩ Saulu aarĩ mũteng’eri mũno, na aarĩ njamba ĩrĩ hinya. Andũ nĩ makenire mũno nĩ ũndũ wa Jehova kũmaamũrĩra Saulu atuĩke mũthamaki wao. Othe maanĩrĩire na mũgambo mũnene makiuga: ‘Mũthamaki arotũũra!’

Thũ cia Isiraeli ciarĩ na hinya makĩria ya mũno. No makĩrĩrĩirie kũnyarira Aisiraeli. Saulu aatuĩka mũthamaki o ũguo-rĩ, Aamoni magĩũka kũhũrana nao. No Saulu agĩthagathaga mbũtũ nene ya ita, na agĩgĩtoria Aamoni. Ũndũ ũyũ ũgĩkenia andũ mũno tondũ Saulu nĩ mũthamaki.

O ũrĩa mĩaka yaathire na mbere-rĩ, Saulu nĩatongoririe Aisiraeli magĩe na ũhotani mũingĩ wa thũ ciao. Ningĩ Saulu nĩ aarĩ na mũriũ warĩ njamba wetagwo Jonathani. Nake Jonathani nĩaateithĩrĩirie Isiraeli kũhotana mbaara nyingĩ. Afilisiti maathire na mbere gũtuĩka thũ ya Aisiraeli ĩrĩa njũru. Mũthenya ũmwe Afilisiti ngiri nyingĩ nĩmokire kũrũa na Aisiraeli.

Samueli nĩ eerire Saulu amweterere o nginya rĩrĩa arĩũka kũrutĩra Jehova igongona. No Samueli ndaahiũhire gũka. Saulu agĩĩtigĩra atĩ Afilisiti nĩmekwambĩrĩria mbaara, na nĩ ũndũ ũcio agĩthiĩ na mbere akĩruta igongona. Mũthia-inĩ rĩrĩa Samueli aakinyire, akĩĩra Saulu atĩ nĩ oina watho. Samueli akĩmwĩra atĩrĩ, ‘Jehova nĩethurĩire mũndũ ũngĩ atuĩke mũthamaki wa Isiraeli.’

Thutha-inĩ ningĩ Saulu akiuna watho rĩngĩ. Rĩu Samueli agĩkĩmwĩra atĩrĩ: ‘Nĩkaba gwathĩkĩra Jehova gũkĩra kũruta igongona rĩa ng’ondu ĩrĩa njega. Tondũ ndũnathĩkĩra Jehova-rĩ, o nake Jehova nĩaregete ũtuĩke mũthamaki wa Isiraeli.’

No tũhote kwĩruta ithomo rĩega kuumanagia na ũhoro ũyũ. Ũgũtuonia ũrĩa arĩ bata gwathĩkĩra Jehova hĩndĩ ciothe. Ningĩ tũkwĩruta atĩ, o na mũndũ mwega, ta ũrĩa Saulu aatariĩ, no agarũrũke atuĩke mũũru. No twende gũtuĩka andũ oru?