AKIMONA Samwela byo aitulwijilenga manyi pa mutwe wa mwanamulume. Bino byo byo bamubanga muntu pa kumwesha’mba bamusala kwikala mfumu. Yehoba waambijile Samwela kwitulwila manyi pa mutwe wa kwa Saulo. Ajinga manyi anunkilanga bulongo.

Saulo walangulukilenga’mba kechi wafwainwe kwikala mfumu ne. Wabujile Samwela amba: ‘Amiwa ne mwina Benjamina wa mu mukoka mucheche wa mu mikoka ya bena Isalela. Mambo ka o mwañambila kuba’mba ngikale ke mfumu?’ Yehoba wamutemenwe Saulo mambo kechi witotelenga’mba wanema kukila bakwabo ne. O ene mambo Lesa o amusajijile kuba’mba ekale mfumu.

Bino Saulo kechi wajinga mwanyike nangwa kwikala muyanji ne. Wafumine ku kisemi kya banonshi kabiji wajinga mwanamulume walepa wamwekananga bulongo. Walepele kukila bantu bonse mu Isalela! Kabiji Saulo wajinga bingi na lubilo ne ngovu. Bantu batemenwe bingi Yehoba byo asajile Saulo kwikala mfumu. Ponkapo bantu bonse babijikile’mba: ‘Mfumu ekale myaka!’

Balwanyi ba bena Isalela bajinga na ngovu. Bamanyikilenga bingi bena Isalela. Kakimyetu kacheche panyuma ya kwikazha Saulo pa bufumu, bena Amonyi baishile kuba’mba balwe nabo. Bino Saulo wanengezhezhe nzhita ikatampe kabiji ne kushinda bena Amonyi. Kino kyalengejile bantu kutemwa bingi kuba’mba Saulo kine ye mfumu.

Monka mwavujijilenga myaka, Saulo watangijijilenga bena Isalela mu makondo avula bingi ne kushinda balwanyi babo. Saulo wajinga ne na mwananji wamulume wajinga na ngovu. Jizhina janji wajinga Yonafwanyi. Kabiji Yonafwanyi wakwashishenga bena Isalela kushinda mu makondo avula bingi. Nangwa byonkabyo, bena Filishitiya nabo bajinga balwanyi bashinta ba bena Isalela. Juba jimo, bena Filishitiya bavula bingi baishile kulwa nkondo na bena Isalela.

Samwela waambijile Saulo amba amupembelele eye alambule mulambo wa kusoka nangwa kupana kya bupe kwi Yehoba. Bino Samwela kechi waishile bukiji ne. Saulo waumvwine moyo kuba’mba bena Filishitiya baya bavulumune nkondo. Onkao mambo, witendekejileko aye mwine kulambula mulambo wa kusoka. Samwela byo aishile, wamwambijile Saulo amba kechi wakokejile ne. Samwela waambile’mba: ‘Yehoba ukasala muntu mukwabo kwikala mfumu wa bena Isalela.’

Kabiji pa kimye kikwabo, Saulo kechi wakokejile ne. Onkao mambo, Samwela wamwambijile’mba: ‘Kyawama kukokela Yehoba kukila kumupa kya bupe kya mukooko wawamisha. Na mambo a kuba kechi wakokela Yehoba ne, Yehoba kechi usakukuswisha kutwajijila kwikala mfumu wa bena Isalela ne.’

Twakonsha kufunjilako kintu kyawama bingi ku kino. Kibena kumwesha buneme bwa kukokela Yehoba kimye kyonse. Kabiji kibena kumwesha’mba muntu wawama, byonka byajinga Saulo, wakonsha kwaluka ne kwikala watama. Kechi tukeba kwikala bantu batama nangwa pachechetu ne, ke ibyo nenyi?