TOFAWƆ Samiɔŋ poo hoo chuɛiyaŋ talaa o lebol. Hei ndaa tosal waŋndo ni le chɔmndo maa o hɛliŋ le waa masa. Jɛhowa dimul Samiɔŋ ni le mbo kɔ tala maŋ Sɔɔl o lebol. Chuɛima teŋgeŋndaŋ ma cho ni. Nduyɛ chuŋ kɛndɔɔ pila ma nɔ ni.

Sɔɔl ndoo yiyaŋ bɛɛ maa o bɛnda le waa masa le. Mbo dimul Samiɔŋ aa: ‘O kaale Bɛŋjamiŋndeŋ choo ya fula ni, kaale pɔmbuiiniileŋ Isɔluɛi. Le yɛɛ ŋ dimi yɛ maa I cho wa masa?’ Jɛhowa hɛnaŋ a Sɔɔl, kanifuule, o chueŋnuŋ ndupila maa kaasoŋnɔ le o cho niŋ te, kɛlɛŋgaa wana sɔwɛ. Lelaŋ kpeekpei O hɛli ndu ni le mbo wa masa.

Kɛ Sɔɔl ve wana tambɛi le, kɛlɛŋgaa bɛɛ poombɔ pɔmbɔ. O yuŋgu nyɛ sɔlaa choo o fula ni. Nduyɛ, o wa o vilɛi kpoloŋ. Ndoo naŋ bɔɔ naŋɔɔ lahɔllo. Ndoo hiou wana o wana Isɔluɛi bandei chobe. Sɔɔl ndoo nɔla bɔɔ vɛlɛ kilta ŋpelulaŋ. Nduyɛ wana pɔnɔ ma yoomoo pila o wa ni. Mi waŋnda naŋ kɔl tau mɛɛ Jɛhowa hɛli Sɔɔl le mbo wa masa. Ma wa deŋioo choo aa: ‘Masaa viou achal fɔ!’

Yaamɔɔwaa Isɔluɛitiiya wa tuŋ hiouwɔɔ lachi a kuiyo. Nduyɛ lende koni nda tuisi nda nyɛpalaa choo ni. Mɛɛ Sɔɔl simnuŋ dɔɔ masaa, mi Amɔnaitiiya huŋ le nda chɔulabaa. Kɛ mi Sɔɔl chuuŋgiaa puaa nduaa chɔuwa kunda bɛndoo naapilɛ. Mbo tiu Amɔnaitiiya ba, okoŋ mbo yam chɔuwo. Mi waŋnda duaŋ nyaale maa masaa kpeekpei Sɔɔl cho ni.

Mɛɛ wɔsilaŋ la hiau fau, lende koni Sɔɔl yam chɔulaŋ yaamɔɔwaa ndaa choo ni. Sɔɔl ndoo nɔ vɛlɛ po kɔl sikpaa diolaŋ aa Chɔnataŋ. Mi Chɔnataŋ mala Isɔluɛitiiya chɔulaŋ tau yomɔɔ. Yaamɔɔwaa wɔɔŋ wɔɔŋnda le Isɔluɛitiiya wa Filiitiaŋnda ni. Mɛɛ paale pilɛ mi Filiitiaŋnda haa huŋ waalaŋ o waalaŋ niŋ le Isɔluɛitiiya chɔulabaa.

Okoŋ, mi Samiɔŋ dimul Sɔɔl le mbo chum ndu tei mbo huŋ soli salaa o Jɛhowa lo. Kɛ Samiɔŋ yala hunɔɔ le. Mi sioonde bii Sɔɔl maa Filiitiaŋnda cho suŋ kandɔɔ chɔulabaa a nda. Le hei, o chum Samiɔŋ te, mbo kɔ soli salaa a bandɔ. Mɛɛ Samiɔŋ hiŋ, mbo dimul Sɔɔl maa o kɛɛ diikɔŋndo. Mi Samiɔŋ dimul ndu vɛlɛ aa: ‘Jɛhowa cho wana cheleŋ hɛli mbo siiŋguu ndu masaa le Isɔluɛi.’

Mɛɛ nyɔɔ viou kpɛɛ, mi Sɔɔl kɛɛ vɛlɛ diikɔŋndo. Mi Samiɔŋ dimul ndu aa: ‘Diikɔŋndo Jɛhowa bɛnda mbo hiau saa walaŋndo salaa solioo. Le mɛɛ ŋ kɛɛ Jɛhowa diikɔŋ yɛ, o cho num faŋa o masaleŋ choo Isɔluɛi.’

Naa bɛɛ ŋ pɛɛku isɔɔ o hei niŋ. Hei cho naa chɔmndo maa diikɔŋndo Jɛhowa lɔɔ lɔɔ cho bɔɔ nyɛ sɔwɛ. I cho naa vɛlɛ pɛɛkoo maa mi waŋndo kandu nyɛkɛndɛi maa Sɔɔl, kɛ o mɛɛlulaŋ mbo simnuŋ o wɔɔŋ. Nduyɛ, ŋ yeema miŋ simnuŋ a wɔɔŋ te. Vɛ, lende le?