Chihande 56

Saulu—Mwangana WavaIsalele Watete

TALA Samwele anakuhingunwina maji hamutwe wamutu. Mukiko valingilenga kumutu kusolola ngwavo vanamusakula kupwa mwangana. Yehova nalweze Samwele ahingunwine maji hamutwe waSaulu. Awa himaji alivumba lyamwaza.

Saulu kashinganyekele nge atelemo kupwa mwanganako. Mwalweza Samwele ngwenyi: ‘Ami ngukaMbenjamine, muyachi waundende kumiyachi yavaIsalele. Mwomwo ika nauhanjika ngwove ngupwenga mwangana?’ Yehova namuzange Saulu hakuhona kulitohwesa nakulivwimba. Shikaho namusakula apwenga mwangana.

Oloze Saulu keshi wakuhutwa chipwe kanyikeko. Wakutanga yaluheto, kaha hilunga wamwaza, wakutaluka. Wamusukuko chindende kuhambakana vakwavo vaIsalele vosena! Saulu himuka-kulaha chikuma jimbushi, kaha wakutakama. Vatu vanawahilila Yehova hakuvasakwila Saulu kupwa mwangana. Vosena hikulikuwa ngwavo: ‘Mwangana ayoyenga!’

Vaka-kole javaIsalele hanga vachili nangolo. Chivatwalaho lika nakuyanjisa vaIsalele. Hakumuhaka Saulu hawangana, vaAmone hikwiza nakuvafumbukila. Jino Saulu hikumbata maswalale vavavulu, nakuvafungulula vaAmone. Echi chasuulwishile vatu ngwavo kumana Saulu himwangana.

Mukuhita chamyaka, Saulu chatwala lika vaIsalele mujijita jajivulu nakuhonesa vaka-kole javo. Saulu ali namwana wakuhamuka, Yonatane. Yonatane anakukafwa vaIsalele kufungulula jijita jajivulu. VaFwilishite hanga vali lika vaka-kole vavapi javaIsalele. Likumbi limwe vaFwilishite makombakaji namakombakaji hikwiza vazunge navaIsalele.

Samwele mwalweza Saulu avandamine palanga nomu mweza ikiye nakulumba wana, kuli Yehova. Jino Samwele kuheta washi chiku. Saulu woma wamukwate ngwenyi linwomu vaFwilishite vaputule jita, ngocho hikuya nakulumba wana. Omu neza Samwele, himwamulweza Saulu ngwenyi kononokeleko. Samwele ngwenyi: ‘Yehova mwasakula mutu weka uze mwapwa mwangana waIsalele.’

Saulu mwakana kwononoka nawa. Kaha Samwele himwamulweza ngwenyi: ‘Kwononokela Yehova chinawahe kuhambakana wana wamukoko wamwaza. Hakuhona kwononoka Yehova, Yehova nakukane ove kupwa mwangana waIsalele.’

Tunahase kulinangulaho chishina chamwaza. Hano hali nakutulweza kulema chakwononokanga Yehova makumbi osena. Chili nakusolola nawa nge namutu wamwaza, chiwenya mwapwile Saulu, nahase kwalumuka nakupwa wamupi. Katwasaka kupwa vatu vavapiko, ngwetu?

Samwele 1 tupetulu 9 swi naku 11; 13:5-14; 14:47-52; 15:1-35; Samwele 2, 1:23.