MPANJI 56

Sawulu—Mwanta Watachi WawaIsarela

TALAÑA Samweli nakuhuñunwina manji hamutu weyala. Ichi dichelileñawu hakumwekesha nawu muntu anamutondi kwikala mwanta. Yehova namuleji Samweli kumuwayisha Sawulu manji mumutu. Himanji alema anunkila chiwahi.

Sawulu watoñojokeli nindi hadiña washikilamu kwikala mwantaku. Hakumuleja Samweli nindi, ‘Ami nidi wakumutaña waBenjamini wakehelamu muIsarela. Wunahoshelidi neyi nakekala mwanta?’ Yehova hakumukeña Sawulu muloña hanadifwikiji kwikala muneni hela walemaku. Dimuloña waweni Wunamutondeliyi kwikala mwanta.

Ilaña Sawulu hikazweñi hela kansi wanyanyaku. Wafuma kuchisaka chaheta, himuntu wasweja lubanji nikutaluka. Wayibadika kutaluka akwawu ejima amuIsarela! Sawulu himukwakutemuka lufuchi nankashi, nawa himuntu wakola chikupu. Antu anatiyi kuwaha muloña Yehova namutondi Sawulu kwikala mwanta. Wejima wawu hiyakubilela nawu: ‘Mwanta handaku mafuku amavulu!’

Ayilumbu jawaIsarela achidi akola neyi dikalu. Achidi kuleta kukala kwakweni hadi aIsarela. Hanyima yakwila Sawulu anamwilishi dehi mwanta, eniAmoni hiyakwinza nakuyilwisha. Ilaña Sawulu hakukuñulula amashidika amavulu, nawa hakuyishinda eniAmoni. Ichi hichikuyiletela antu muzañalu nawu Sawulu diyi mwanta.

Mukuhita kwayaaka, Sawulu hakuyilombola aIsarela kunjita jajivulu nawa hiyakuyishinda ayilumbu jawu. Sawulu wudi namwana womika, ijina dindi diyi Jonatani. Jonatani hakukwasha Isarela kushinda njita jajivulu. A Fwilistinu achidi ayilumbu asweja kutama awaIsarela. Ifuku dimu makombakaji namakombaji awaFwilistinu hiyakwinza nakulwisha aIsarela.

Samweli hakumuleja Sawulu kumuhembelela neyi nenzi kulonda alambuli mulambu hela chawaana kudi Yehova. Ilaña Samweli hakulaba kwinza. Sawulu hakuchina nindi aFwilistinu keña atachiki njita, dichi hakulambula mulambu yomwenindi. Nkumininaku Samweli chanenziyi, hakumuleja Sawulu nindi nadikañi. Samweli hakuhosha nindi, ‘Yehova wukutonda muntu wacheñi kwikala mwanta muIsarela.’

Nkumininaku, Sawulu hakudikaña cheñi. Dichi Samweli hakumuleja nindi: ‘Chachiwahi kumwovwahila Yehova kubadika kumuketwila yimuna yanyikoku yayiwahi. Muloña hiwunamwovwahili Yehovaku, Yehova hakukwiteja kwikala mwanta waIsarelaku.’

Tunateli kudizilaku kuchumichi. Chinakutuleja nawu chuma chabadika kulema yowu kumwovwahila Yehova mpinji yejima. Chinakumwekesha cheñi nawu, muntu wamuwahi neyi chadiña Sawulu nateli kuhimpa nakwikala muntu watama. Hitunakukeña kwikala atamaku, indi nenu?

1 Samweli kapetulu 9 nakushika 11; 13:5-14; 14:47-52; 15:1-35; 2 Samweli 1:23.