SAMUELAN mipa lua hriak a leih hi en teh. Lalber atana thlan a ni tawh tih lantir turin hei hi mi chunga an tih thin chu a ni. Jehovan Saula lua hriak leih turin Samuela a hrilh a. Hriak rimtui bik a ni.

Saula chuan lalber ni tura tha tawkah a inngai lo va. Israel-a a te ber Benjamina hnama mi ka ni. Engvanginnge lalber ka ni ang tih i sawi? tiin Samuela a zawt a. Mi lian leh pawimawh nih der a tum loh avangin Jehovan Saula a duh a. Chuvangin Lalber ni turin a thlang a ni.

Mahse Saula chu mi rethei emaw mi te emaw a ni lo. Mi hausa chhungkuaa mi a ni a, mi hmeltha, sang tak a ni. Israel rama tu ai pawhin kephah chen velin a sawng zawk a! Saula chu tlan pawh a chak em em a, mi chak em em a ni. Jehovan lalber ni tura Saula a thlang chu mipui an lawm a. ‘Lalber chu dam rei rawh se,’ tiin an au dual dual mai a ni.

Israel hmelmate chu an chak ngaiin an chak reng a. Israel-mite tan buaina tam tak an la awmtir a. Lalbera Saula siam a nih hnu lawkah, anmahni do turin Amon-mite an lo chho va. Mahse Saulan sipairual tam tak a khawm a, Ammon-mite chu a hneh a.

Saula lalber a ni chuan mipui a tihlim hle a. Kumte a ral zel a, Saula chuan Israel-mite hma a hruaiin, an hmelmate a hnehpui zel a. Saula chuan fapa huaisen, a hming Jonathana a nei bawk a. Jonathana chuan indona tam tak hneh turin Israel-mite a tanpui a. Philistia mite chu Israel hmelma tha lo ber an la ni reng a. Ni khat chu Israel-mite do turin Philistia-mite sang tam tak an lo kal a.

Samuelan Saula chu, a lo kal a, Jehova hnena inthawina emaw thilpek emaw a rawn siam thlenga nghak turin a hrilh a. Mahse, Samuela a lo kal muangchang a. Saula chuan Philistia-miten indo an tan mai ang tih a hlau va, tichuan amahin inthawina a siam ta a. A tawpa Samuela a lo kal chuan Saula chu thu awih lo a ni tih a hrilh a. ‘Israel chhunga lalber ni turin Jehovan mi dang a thlang ang,’ Samuelan a ti a.

A hnuah Saulan thu a awih lo leh a. Chuvangin Samuelan: ‘Beram tha bera a hnena thilpek pek aiin thu awih hi a tha zawk. Jehova thu i awih loh tak avangin Jehovan Israel lalberah a duh ta lo che a ni,’ tiin a hrilh a.

He mi atang hian zir tur tha tak kan hre thei. Jehova thu awih reng pawimawhzia min hriattir a ni. Saula anga mi tha thin pawh, a inthlakin a rawn tha lo thei tih pawh a lantir a. Tha lo nih kan duh ngai lo a ni lawm ni?