Zistwar 56

Saül—Premie Lerwa Israël

GETE! Samuel pe vers delwil lor latet enn misie. Samem ki ti abitie fer avek enn dimounn pou montre ki finn swazir li kouma lerwa. Jéhovah dir Samuel vers delwil lor latet Saül. Se enn delwil spesial ki santi bon.

Saül panse ki li pa ase bon pou vinn enn lerwa. Li dir Samuel: ‘Mo sorti dan tribi Benjamin, pli tipti tribi dan Israël. Kifer to dir ki mo pou vinn lerwa?’ Jéhovah kontan Saül parski li pa pretann ki li enn dimounn ki inportan. Se pou sa ki Jéhovah swazir li pou vinn lerwa.

Me Saül pa enn dimounn mizer ni enn ti dimounn. Li sorti dan enn fami ris ek li enn zoli garson, li bien ot. Bann lezot dimounn dan Israël ti tap kot so zepol! Saül, enn kikenn ki galoup bien vit ek li bien for. Lepep bien kontan ki Jéhovah inn swazir Saül kouma zot lerwa. Zot tou koumans kriye: ‘Viv lerwa!’

Bann lennmi Israël ankor touzour for. Zot pe kontign fer dominer ar bann Izraelit. Apenn Saül vinn lerwa, bann Amonit vinn lager ar zot. Me Saül rasanble enn gran larme ek li gagn laviktwar lor bann Amonit. Sa fer lepep kontan ki Saül lerwa.

Amezir ki bann lane pase, Saül fer bann Izraelit gagn boukou viktwar lor zot bann lennmi. Saül ena osi enn garson bien kouraze ki apel Yonathân. Ek Yonathân ed bann Izraelit pou gagn boukou lager. Bann Filistin touzour pli gran lennmi bann Izraelit. Enn zour plizir milye Filistin vinn lager ar bann Izraelit.

Samuel dir Saül atann li vini pou ki li ofer enn sakrifis Jéhovah. Me Samuel tarde pou vini. Saül gagn per pangar bann Filistin koumans lager, alor li ofer sakrifis-la limem. Finalman kan Samuel vini, li dir Saül ki li’nn dezobeir Jéhovah. Samuel dir: ‘Jéhovah pou swazir enn lot dimounn pou vinn lerwa lor Israël.’

Plitar Saül dezobeir ankor enn fwa. Alor Samuel dir li: ‘Vomie obeir Jéhovah ki ofer Li pli bon mouton ki ena. Parski to pa’nn obeir Jéhovah, Jéhovah pa pou gard twa kouma lerwa Israël.’

Sa zistwar-la aprann nou enn bon leson. Li montre nou ki kantite li inportan ki touletan nou obeir Jéhovah. Li osi montre nou kouma enn bon dimounn parey kouma Saül, kapav sanze ek vinn move. Zame nou pa pou anvi vinn move, pa vre?

1 Samuel sapit 9-11; 1 Samuel 13:5-14; 14:47-52; 15:1-35; 2 Samuel 1:23.