TLAPOUALISTLI 56

Saúl achto ueyi tekiua itech Israel

XIKITA ken Samuel kitlalilijtok chiauak ipan itsonteko nin tlakatl. Nin okichiuiliayaj akaj pampa kiteititiskej yokipejpenkej ken ueyi tekiua. Jehová kiluia Samuel ma kitlalili chiauak ipan itsonteko Saúl. Nin chiauak kualtsin ajuiak.

Saúl okineltokaya amo uelis tekitiskia ken ueyi tekiua. Saúl okilui Samuel: ‘Ne onineski itech inechikol Benjamín, tlen okachi tsikitsin nechikol itech Israel. ¿Tleka tikijtoa ne niyetos ueyi tekiua?’. Jehová okipaktiaya Saúl pampa amo omoueyimatiaya. Ik non, okipejpenki pampa yetoskia ueyi tekiua.

Saúl amo okatka se tlakatl tsikitsin nion itlaj okipoloaya. Ichanejkauan okipiayaj miak tomin, uan ye okatka kuajkualtsin uan uejkapantik. ¡Nochtin israelitas oajsia san itech ikechpan! Saúl noijki kuali omotlaloaya, uan okipiaya miak chikaualistli. Israelitas oyolpakej pampa Jehová okipejpenki Saúl pampa yetoskia ueyi tekiua. Nochtin chikauak okijtojkej: ‘¡Ma yolto ueyi tekiua!’.

Akinmej okinkokoliayaj israelitas ok okintlajyouiltiayaj. Satepan okitlalijkej Saúl ken ueyi tekiua, amonitas okinekiayaj kinteuiskej. Maski ijkon, Saúl okinnechiko miakej soldados uan ijkon okintlanili amonitas. Israelitas oyolpakej pampa Saúl okatka ken ueyi tekiua.

Opanok miak xiuitl, uan Saúl okichi israelitas miakpa ma kintlatlanilikan akinmej okinkokoliayaj. Saúl noijki okipiaya se ikone tlen yolchikauak okatka, omotokayotiaya Jonatán. Uan Jonatán okinpaleui israelitas miakpa ma tlatlanikan. Filisteos yejuan akinmej ok okachi okinkokoliayaj israelitas. Se tonal, sapanoa miakej filisteos oualajkej pampa kiteuiskiaj Israel.

Samuel okilui Saúl ma kichia ma ajsi uan ye kitlamaniliskia Jehová. Maski ijkon, Samuel ouejka. Saúl omomojti pampa filisteos uelis kipeualtiskiaj tlateuiskej, ik non, amo okichixki Samuel uan ye okitlamanili Jehová. Saiktlami, ijkuak Samuel oajsito, okilui Saúl amo otetlakamatki. Uan Samuel okijto: ‘Jehová kipejpenas okse tlakatl pampa yetos ueyi tekiua itech Israel’.

Satepan, Saúl oksepa amo otetlakamatki. Samuel okilui: ‘Okachi kuali se kitlakamatis Jehová uan amo se kimakas se ichka tlen okachi kuali ken se tetliokolil. Ken amo otiktlakamatki Jehová, ye ayakmo mitskauas xiyeto ueyi tekiua itech Israel’.

Nin techmachtia itlaj tlen miak ipati. Techititia kipia miak ipati nochipa ma tiktlakamatikan Jehová. Noijki techititia, maski akaj uelis yetos yolkuali ken Saúl, satepan uelis mochiuas amo yolkuali. ¡Amo keman ijkon ma techpano! ¿Amo melauak?

1 Samuel 9 a 11; 1 Sa 13:5-14; 14:47-52; 15:1-35; 2 Samuel 1:23.