KITIA la a Samuela kua liligi e lolo ke he ulu he tagata. Ko e mena anei ne fa taute e lautolu ke fakakite kua fifili e tagata ia ke eke mo patuiki. Ne tala age a Iehova ki a Samuela ke liligi e lolo ke he ulu ha Saulo. Ko e lolo manogi pauaki.

Ne manamanatu a Saulo kua nakai mitaki a ia ke eke mo patuiki. ‘Ko au mai he magafaoa ha Peniamina, ko e magafaoa ne tote lahi i Isaraela,’ he tala age e ia ki a Samuela. ‘Ko e ha ne pehe ai a koe to eke au mo patuiki?’ Ne fiafia a Iehova ki a Saulo ha kua nakai fakatupua a ia ke pehē kua lahi mo e mahuiaga. Ko e kakano haia ne fifili e Iehova a ia mo patuiki.

Ka e nakai ko e tagata mativa po ke tagata tote a Saulo. Ne tupu mai a ia he magafaoa mautū, ti ko e tagata mata mitaki lahi mo e tokoluga a ia. Liga taha e futu ne tokoluga hake a ia mai he tau tagata i Isaraela! Ko Saulo ko e tagata mafiti lahi he poitufi, ti malolō lahi foki a ia. Kua fiafia e tau tagata ha kua fifili e Iehova a Saulo ke eke mo patuiki. Ne kamata a lautolu oti ke kalaga: ‘Kia moui loa e patuiki!’

Ko e tau fī ha Isaraela kua tumau ni e malolō. Ne fakatupu lekua lahi agaia a lautolu ke he tau Isaraela. Nakai leva he eke a Saulo mo patuiki, ne o mai e tau tagata Amoni ke tau ki a lautolu. Ka e fakapotopoto e Saulo e kautau lahi, ti kautū a ia ke he tau tagata Amoni. Kua fakafiafia he mena nei e tau tagata ha kua patuiki a Saulo.

Loga e tau he mole, ne takitaki e Saulo e tau Isaraela ke he loga e tau kautūaga mai he tau fī ha lautolu. Taha foki e tama taane loto malolō ha Saulo ne higoa ko Ionatana. Ti lagomatai e Ionatana a Isaraela ke kautū ke he loga e tau felakutaki. Ko e tau Filisitia ko e tau fī kelea lahi agaia ha Isaraela. Taha e aho ne o mai e tau afe mo e afe he tau Filisitia ke tau mo e tau Isaraela.

Ne tala age a Samuela ki a Saulo ke fakatali to hau a ia ke taute e poa, po ke mena fakaalofa, ki a Iehova. Ka kua fakatuai a Samuela ke hau. Ne matakutaku a Saulo neke kamata he tau tagata Filisitia e felakutaki, ti taute ni e ia e poa. Ko e magaaho ne hoko mai ai a Samuela, ne pehē a ia ki a Saulo kua liuliu ni a ia. ‘To fifili e Iehova taha tagata ke eke mo patuiki ki Isaraela,’ he talahau e Samuela.

Levaleva ti liuliu foki a Saulo. Ti tala age a Samuela ki a ia: ‘Kua mua e mitaki ke omaoma ki a Iehova ke he foaki e mena fakaalofa ki a ia ko e mamoe taane ne mua he mitaki. Ha kua nakai omaoma a koe ki a Iehova, to nakai toka mau e Iehova a koe mo patuiki ha Isaraela.’

Maeke a tautolu ke iloa e fakaakoaga mitaki mai he mena nei. Kua fakakite mai ki a tautolu e aoga ke omaoma tumau ki a Iehova. Kua fakakite foki ko e tagata mitaki, tuga a Saulo he magaaho fakamua, na maeke ke hiki ti eke mo tagata kelea. Nakai manako a tautolu ke eke mo tau tagata kelea, pihia nakai a tautolu?