SAMUELE umueete, ukahi nokutila omulela pomutwe womulume ou? Etyi ankho otyo tyilingwa, pala okulekesa okuti omunthu oo waholovonua opo akale ohamba. Yehova wapopila Samuele atile omulela pomutwe wa Saulu. Ankho omulela oo, wakolela unene nokuanika nawa.

Saulu ankho usoka okuti kafuilepo pala okukala ohamba. Apopila Samuele okuti: ‘Ame ndyi womuhoko wa Benjamim. Omuhoko umue omututu unene mo Isilayeli. Omokonda yatyi upopila okuti mandyilingi ohamba?’ Yehova ankho uhole Saulu. Mokonda ankho Saulu kahande okulipaka kounene. Otyo Huku emukoyela opo akale ohamba.

Mahi, Saulu ankho kahepele. Tupu ankho hamulumeko omututu. Saulu watunda mombunga imue yovahona. Ankho omulume omule, omuwa unene. Saulu ankho omule vali tyipona ovanthu aveho mo Isilayeli. Ankho omulume umue wapama unene. Tupu ankho uhateka unene. Ovanthu avahambukwa unene, etyi Yehova aholovona Saulu opo akale ohamba yavo. Ovanthu aveho avahimbika okutwa ondolo okuti: ‘Alililili ohamba Saulu!’

Onondyale mbova Isilayeli vatualeleko okukala tyapama. Ankho nkhele vamonesa ova Isilayeli ononkhumbi. Iya etyi Saulu alinga ohamba, ovanthu voko Amom, aveiya okulwisa ova Isilayeli. Mahi, Saulu apongiya ovalume ovanyingi vovita, iya avafindi onondyale mbavo. Ovanthu avahambukwa unene etyi Saulu alinga ohamba yavo.

Mokuenda kuomanima, Saulu wakuatesako ova Isilayeli okufinda onondyale mbavo ovikando ovinyingi. Tupu Saulu ankho una omona umue wakola omutima utiwa o Jonatã. Iya Jonatã akuatesako ova Isilayeli okufinda ovita ovinyingi. Ova Filisteu ankho onondyale ononene mbova Isilayeli. Onthiki imue omafualali omanyingi ova Filisteu, aeya okulwisa ova Isilayeli.

Samuele wapopila Saulu emukevelele alo ehika, opo valingile Yehova otyilikutila. Mahi, Samuele ankho ukahi nokuseta. Iya Saulu akala nouoma wokuti ova Filisteu mavahimbika ovilwa. Moluotyo, Saulu alingi otyilikutila aike. Etyi Samuele ehika, apopila Saulu okuti: kuetavelele ku Yehova. Moluotyo, ‘Yehova maholovona omunthu omukuavo opo akale ohamba yova Isilayeli.’

Konyima yotyo, Saulu alingi vali onkhali onkhuavo. Samuele emupopila okuti: ‘Hahe okutavela ku Yehova, tyipona okumulingila otyilikutila nongi yanina. Mokonda kuetavelele ku Yehova, nae kamekuyeke utualeko okukala ohamba yova Isilayeli.’

Oko tupondola okupolako elongeso limue eewa. Otyo tyilekesa okuti okutavela apeho ku Yehova tyakolela unene. Tupu, tyilekesa okuti omunthu wondalawa, ngetyi Saulu ali potete upondola okupiluluka, akala ondingavivi. Onthue katuhande okukala onondingavivi. Ine tuhanda?