ONA Samuweri ankuikha mafuta mu msolo mwa mwamunayu. Ndibzo bzomwe bzikhacitiridwa kwa munthu, kufuna kulatiza kuti iye wasankhulidwa ninga mambo. Yahova adauza Samuweri kuti aikhe mafuta mu msolo mwa Sauli. Yakhali mafuta yakupambulika, na yakununcira bwino.

Sauli akhabziyesa lini kuti akhadathemera kukhala mambo. Iye adati kwa Samuweri: ‘Ndine wa dzinza la Benjamini, lomwe n’ling’onoletu mu Jirayeri muno. Thangwe ranyi mukulewa kuti ndidzakhale mambo?’ Yahova akhamufuna Sauliyo thangwe iye akhabziyesa lini kukhala munthu mkulu na wakufunika. Ndipopa Iye adamusankhula kuti akhale mambo.

Tsono Sauli akhali lini munthu wakusauka ne mng’ono. Iye akhali wa m’banja lakudala, ndipo akhali mtali na wakudeka kwene-kwene. Iye akhali mtali kuposa ali-wense mu Jirayerimo! Sauli akhalimbo munthu wa liwiro kwene-kwene na wa mphanvu zizinji. Wanthu wadakomedwa pomwe Yahova adasankhula Sauli kuti akhale mambo. Wense wadayamba kukuwa, waciti: ‘Mambo akhale na moyo utali!’

Anyamadulanthaka wa Jirayeri akhali wa mphanvu kwene-kwene kuposa kale. Iwo wakhambabweresera mabvuto Wajirayeriwo. Pomwe Sauli adakhala mambo, m’nthawe ing’ono-ng’ono, wanthu wa ku Amoni wadabwera kudzamenyana nawo. Tsono Sauli adakonkha thimu likulu la anyankhondo, ndipo adakunda nkhondoyo. Bzimwebzo bzidacitisa kuti wanthu wale wakomedwe kukhala na Sauli ninga mambo.

Na kupita kwa magole, Sauli adatsogolera Wajirayeriwo pa kukunda anyamadulanthaka wawo pa nkhondo zizinji. Sauli akhanayembo mwana wakulimba mtima, dzina lace Jonatani. Ndipo Jonataniyo adathandiza Jirayeri kukunda nkhondo zizinji. Wafilisiti wakhali anyamadulanthaka wakuipa kwene-kwene wa Wajirayeri. Nsiku inango, Wafilisiti wazinjisa wadabwera kudzamenyana pomwe na Wajirayeri.

Samuweri adauza Sauli kuti adikhire mpaka iye abwere, acidzapereka nsembe kwa Yahova. Tsono Samuweri adacedwa kubwerako. Sauli na  mantha kuti Wafilisitiwo wangadayamba nkhondoyo, tenepo iye adapereka nsembe ire. Pakumalizira, pomwe Samuweri adadzabwera, iye adauza Sauliyo kuti akhalibe kubvera. Samuweri adati: ‘Yahova anisankhula munthu munango kuti akhale mambo wa Jirayeri.’

Patsogolo pace Sauli alibe kudzabvera pomwe. Tenepo, Samuweri adati: ‘Bziri bwino kubvera Yahova kuposa kumupasa bira wabwino ninga nsembe. Pakuti iwepo ulibe kubvera Yahova, Yahova an’dzalekerera lini kuti upitirize kukhala mambo wa Jirayeri.’

Tingapfunze cinthu cabwino na bzimwebzi. Bzimwebzi bzimbalatiza momwe mpsakufunika kubvera Yahova nthawe zense. Ndipo bzimbalatizambo kuti munthu wabwino ninga momwe Sauli akhaliri, angacinje, acikhala wakuipa. Ifepano tin’funa lini kukhala wakuipa, n’tenepo lini?