56 yachachiy

Israelmanta ñawpa kaq rey

SAMUEL kay runap umanman aceiteta suruchichkasqanta qhawariy. Kaytaqa pichus reyjina akllasqa kasqanta rikuchinapaq ruwaq kanku. Jehová Samuelta aceiteta Saulpa umanman suruchinanta kamachirqa. Kay acieteqa sumaq qʼapayniyuq karqa.

Saulqa mana kamachiyta atinanta yuyarqa, ‘ñuqaqa Benjamín ayllumanta kani, aswan juchʼuy ayllumanta. ¿Imaraykutaq rey kanki, nispa niwanki?’, nispa Samuelta nirqa. Jehová Saulta munakurqa mana jatunchakusqanrayku. Chayrayku rey kananpaq Saulta akllarqa.

Saulqa mana waqchachu, nitaq juchʼuysituchu. Payqa juk qhapaq ayllumanta jamun, may kʼachitu jatun runataq karqa. ¡Mayqin israelitamantapis juk umawanjina astawan jatun karqa! Saulqa sumaqta correq, may kallpayuqtaq karqa. Israelitasqa Diosninchik Saulta rey kananpaq akllasqanmanta kusikurqanku. Tukuytaq qhaparinku: ‘¡Jallalla, jallalla reyman!’, nispa.

Israelitaspa enemigosninqa kallpayuq kanku. Saúl rey kasqanmanta pisinman, amonitas paykunawan maqanakunankupaq wicharinku. Saulqa may chhika runasta tantaspa, amonitasta atiparqa. Llaqtaqa Saúl rey kasqanmanta kusikun.

Saulwan israelitaswan achkha maqanakuykunapi atiparqanku. Chantapis Saulpa juk sumaq churin kapurqa, Jonatán sutiyuq. Paypis israelitasta maqanakuypi atipanankupaq yanaparqa. Filisteosqa Israelpa aswan phiña enemigosnin kanku. Juk pʼunchay israelitaswan may chhika filisteos maqanakuq wicharinku.

Samuelqa Jehovapaq uywata qʼulachiq jamunaykama suyawanki, nispa Saulta nirqa. Samuel mana usqhayta chayamuptin, Saulqa filisteos maqanakuyta qallarinankuta manchachikun, chayrayku ñawparpaspa pay kikin Jehovapaq qʼulachipun. Samuel chayaytawan mana kasukusqanrayku Saulta nirqa. Kunanqa: ‘Jehovaqa wak runata reytajina Israelman churanqa’, nispa.

Aswan qhipaman Saulqa manallataq kasukunchu. Samuel nirqa: ‘Chiqamanta aswan allin Jehovata kasunaqa, uywata wañuchisqa qʼulachinamanta nisqaqa. Mana Jehovata kasukusqaykirayku, payqa manaña Israelmanta reytajina japʼisunqachu’, nispa.

Kaymanta juk sumaq kʼamiyta yachakusunman. Diostaqa tukuy imapi kasukunanchik tiyan. Chantapis Sauljina juk allin runaqa saqraman tukunman. ¡Mana jaykʼaq chayman urmananchikchu tiyan! ¿Ichari?

1 Samuel, 9 tʼaqamanta 11 tʼaqakama; 13:5-14; 14:47-52; 15:1-35; 2 Samuel 1:23.