ONANI Samueli anakhutula mafuta pa nsolo pa mamuna. Pyenepi ndipyo pikhacitwa munthu towera kupangiza kuti iye asankhulwa kukhala mambo. Yahova apanga Samueli kuti akhutule mafuta pa nsolo pa Sauli. Anewa akhali mafuta akupambulika na akununkhira mwadidi.

Sauli akhanyerezera kuti nee akathema mwadidi kukhala mambo. Iye apanga Samueli: ‘Ine ndine wa dzinza ya Benjamini, ing’ono kakamwe m’Israyeli. Thangwi yanji musalonga kuti ndinadzakhala mambo?’ Yahova akhafuna Sauli thangwi iye nee akhapicita kukhala wankulu na wakufunika. Pyenepi ndipyo pidacitisa kuti Iye ansankhule kukhala mambo.

Mbwenye Sauli nee akhali mamuna wakucerenga peno wa cidzo cing’ono tayu. Iye abuluka ku banja yakupfuma, na ndi mamuna wacimo na wakubalika kakamwe. Iye akhali wacimo kubulukira maphewa kwenda kudzulu kupiringana anango onsene m’Israyeli! Sauli akhalimbo mamuna wakuwanga, na wakuthamanga mwakucimbiza kakamwe. Mbumba yakomerwa nakuti Yahova asankhula Sauli kukhala mambo. Iyo yonsene yatoma kukhuwa: ‘Mbakhale maso mambo!’

Anyamalwa a Israyeli akhapitiriza kukhala akuwanga. Iwo akhapitiriza na kucitira Aisrayeli nyatwa zizinji. Mudamala kwene Sauli kuikhwa ninga mambo, Aamoni abwera kudzacita nkhondo na iwo. Mbwenye Sauli agumanyiza anyankhondo azinji, mbawina pembero kwa Aamoni. Pyenepi pyacitisa mbumba kukomerwa kuti Sauli akhali mambo.

M’kupita kwa piaka, Sauli atsogolera Aisrayeli ku mapembero mazinji kwa anyamalwa awo. Sauli akhalimbo na mwana wamamuna wacipapo akhacemerwa Jonatani. Jonatani aphedza Israyeli kupembera nkhondo zizinji. Afilisti akhapitiriza kukhala anyamalwa akunyanya kakamwe a Aisrayeli. Ntsiku inango pikwi na pikwi pya Afilisti aenda kacita nkhondo na Aisrayeli.

Samueli apanga Sauli kuti adikhire mpaka iye afike kudzaikha ntsembe, peno muoni, kwa Yahova. Mbwenye Samueli adembuka kufika. Sauli agopa kuti Afilisti mbadadzatoma nkhondo, natenepa mwakukhonda kudikhira iye apereka ntsembe ekhene. Pakumalisira mudafika Samueli, iye apanga Sauli kuti akhala wakukhonda bvera. Samueli alonga: ‘Yahova anadzasankhula munthu unango kuti akhale mambo wa Israyeli.’

M’kupita kwa nzidzi Sauli akhala pontho wakukhonda bvera. Natenepa Samueli ampanga: ‘Kubvera Yahova ndi kwadidi kupiringana kumpasa ntsembe ya bira yadidi. Nakuti hudabvera Yahova, Yahova nkhabe dzatawirisa kuti upitirize ninga mambo wa Israyeli.’

Tingakwanise kupfunza pfunziro yadidi kwa ipi. Pyenepi pisatipangiza kuti nkhwakufunika tani kubvera Yahova nzidzi onsene. Pisatipangizambo kuti munthu wadidi, ninga Sauli, angakwanise kucinja mbakhala wakuipa. Cipo tisafuna kudzakhala akuipa, kodi si tenepa tayu?