LUKU fa Samuel e kanti oli na tapu na ede fu a man. Na dati den ben gwenti fu du nanga wan sma, fu sori taki den ben teki en leki kownu. Yehovah ben taigi Samuel fu kanti na oli na tapu Saul ede. A de wan spesrutu oli di e smeri switi.

Saul no ben feni taki a ben de bun nofo fu de kownu. ’Mi de fu a lo fu Benyamin, a moro pikinwan na ini Israel’, a e taigi Samuel. ’Fu san ede yu e taki dati mi sa de kownu?’ Yehovah lobi Saul, fu di a no e feni ensrefi hei noso prenspari. Dati meki a e teki en fu de kownu.

Ma Saul a no wan pôti man, a no syatu tu. A kon fu wan gudu famiri. A de wan moi man èn a langa. Komoto fu en skowru go na tapu, a moro langa leki ala tra sma na Israel. Saul kan lon kefalek esi tu èn a tranga srefisrefi. A pipel breiti taki Yehovah teki Saul fu de kownu. Den alamala e bari, taki: ’Meki a kownu libi langa!’

Den feanti fu Israel de moro tranga leki iniwan ten na fesi. Te now ete den e gi den Israelsma furu problema. Syatu baka di Saul ben tron kownu, dan den Amonsma ben kon fu feti nanga den. Ma Saul e tyari wan bigi legre kon makandra èn a e wini den Amonsma. Disi e meki a pipel breiti taki Saul de kownu.

Den yari e pasa èn den Israelsma e wini furu feti nanga Saul leki fesiman. Saul abi sosrefi wan deki-ati manpikin di nen Yonatan. Yonatan e yepi Israel fu wini furu feti. Te now ete den Filistiasma de den moro ogri feanti fu den Israelsma. Wan dei dusundusun Filistiasma e kon feti nanga den Israelsma.

Samuel e taigi Saul fu wakti teleki a kon fu tyari wan ofrandi noso presenti gi Yehovah. Ma Samuel e tan langa fu kon. Saul e frede taki den Filistiasma sa bigin nanga a feti; fu dati ede ensrefi e tyari na ofrandi. Te Samuel kon te fu kaba, a e taigi Saul taki Saul no ben gi yesi. ’Yehovah sa teki wan tra sma fu de kownu na Israel’, Samuel e taki.

Bakaten Saul e trangayesi baka. Fu dati ede Samuel e taigi en: ’A moro bun fu gi yesi na Yehovah leki fu gi en a moro bun skapu di de. Fu di yu ben trangayesi Yehovah, meki Yehovah no sa hori yu leki kownu fu Israel.’

A tori disi e leri wi wan tu bun sani. A e sori wi o prenspari a de fu gi yesi na Yehovah ala ten. A e sori wi tu, taki wan bun sma, soleki fa Saul ben de biginbigin, kan kenki èn kon ogri. Wi no wani kon ogri noiti, a no so?