56-нҗы хекая

Саул ысрайылың илкинҗи патышасы

СЕРЕТ, Самуел бу адамың башына яг гуйяр. Адатча бири патыша беллененде шейле эдйәрдилер. Ехова Самуеле Саулың башына яг гуймагы буюряр. Бу яг якымлы ыслы үйтгешик ягды.

Саул өзүни патыша болмага мынасып гөрмейәрди. Ол Самуеле шейле диййәр: «Мен Ысрайылың иң кичи Бенямин тайпасындан. Сен нәме үчин маңа патыша болмалы диййәрсиң?» Ехова Саулы говы гөрйәр, себәби ол кичигөвүнлиди. Шонуң үчин оны патыша эдип сайлаяр.

Аслында Саул гарып хем таналмаян адам дәлди. Ол бай машгаладан болуп, узын бойлы гөрмегей адамды. Онуң бойы Ысрайылда хеммелерден 30 сантиметре голай узынды. Шейле хем Саул хеммелерден чалт ылгаян, өрән гүйчли адам. Халк Ехованың Саулы патыша эдип сайланына бегенйәр. Хемме адамлар гыгырып: «Яшасын патыша!» диййәрлер.

Ысрайылың душманлары хемишекиси ялы гүйчли. Олар ысрайыллылара өңкүси ялы көп азар берйәрди. Саул патыша беллененден соң, олара гаршы аммонлылар чыкяр. Йөне Саул улы гошун йыгнап, аммонлылары сөвешде еңйәр. Шонуң үчин Саулың патыша боланына халк бегенйәр.

Шол йыллар Ысрайыл халкы Саулың баштутанлыгында көп еңишлер газаняр. Шейле-де Саулың Ёнатан атлы эдермен оглы бар. Ёнатанам Ысрайыла көп сөвешлерде еңмәге көмек эдйәр. Филистилилер ысрайыллыларың өңкүси ялы ганым душманыды. Бир гезек бирнәче мүң филистилилер ысрайыллылара гаршы сөвешмәге гелйәр.

Самуел Саула гарашмагы буюряр, себәби Ехова совгады, ягны гурбаны өзи гелип берҗекди. Эмма Самуел узак вагтлап гелмейәр. Саул филистилилер сөвеше башлар өйдүп, гурбаны өзи берди. Ахыры Самуел геленде, Саулың гулак асмандыгы үчин кәйәп: «Ехова Ысрайыла башга патыша сайлар» диййәр.

Соң Саул ене-де гулак асмаяр. Шонуң үчин Самуел оңа: «Ехова гулак асмак, гоюнларың иң говусыны гурбан бермекден говудыр. Сен Ехова гулак асмандыгың үчин элиңден патышалыгы алар» диййәр.

Биз бу вакадан көп зады өвренип билерис. Бу Ехова хемише гулак асмагың ваҗыпдыгыны гөркезйәр. Шейле-де Саул ялы говы адамың үйтгәп, эрбет болуп билҗекдигини гөркезйәр. Бизиң эрбет боласымыз геленок, догры дәлми?

1 Патышалар 9—11-нҗи баплар; 14:47—52; 15:1—35; 2 Патышалар 1:23.