Makani 56: Saulu Mwami Mutaanzi wa Isilayeli
BONA Samuyele nkwatila mafwuta amutwe wamuntu. Oobu mbobakali kucita kumuntu ikutondezya kuti wasalwa kuba mwami. Jehova waambila Samuyele kutila mafwuta amutwe wa Saulu. Aayo mafwuta aadula alimwi aanunkila kapati.
Saulu tanaakali kulisyoma kuti muntu uuli kabotu uukonzya kuba mwami. Wati kuli Samuyele: ‘Ndili musyobo wa Bbenjamini imusyobo wiinda kuceya mu Isilayeli. Nkaambo nzi ncowaambila kuti ndibe mwami?’ Jehova ulamuyanda Saulu nkaambo talikomezyi alimwi talisumpuli. Nkakaambo kaako wamusala kuba mwami.
Pele Saulu tali mucete alimwi tali mwana muniini. Uzwa mumukwasyi uuvwubide, musankwa mulamfwu alimwi weebeka kapati. Mulamfwu kwamasentimita aali 23 kwiinda bantu boonse bamu Isilayeli. Alimwi Saulu ulabalika kapati alimwi musankwa uujisi nguzu kapati. Bantu bakkomana kuti Jehova wasala Saulu kuba mwami. Boonse boongolola bati: ‘Mwami upone mazuba manji!’
Basikalumamba balwana bana Isilayeli mbayumu kapati. Bacibaletela mapenzi manji bana Isilayeli. Muciindi buyo cisyoonto Saulu naaba mwami, bana Amoni baboola kubalwana. Pele Saulu wabunganya basikalumamba banji, aboobo wabazunda bana Amoni. Eeci cabakkomanisya bantu kuti Saulu mwami ncobeni.
Noyakali kuya ciya myaka, Saulu wasololela bana Isilayeli mukuzunda nkondo zinji. Alimwi Saulu ulijisi mwana sicamba wiitwa kuti Jonatani. Awalo Jonatani wabagwasya bana Isilayeli mukuzunda nkondo zinji. Iba Filisiti bacili basinkondonyina abana Isilayeli ibainda kubija. Buzuba bumwi zyuulu-zyuulu zyaba Filisiti bakaboola kulwana bana Isilayeli.
Samuyele waambila Saulu kuti alindile kusikila aboole azyikupe cituuzyo naa cipego kuli Jehova. Pele Samuyele wamuka kusika. Saulu walibilika kuti iba Filisiti balakonzya kwiibusya nkondo, aboobo wapa cituuzyo kwiinda mumaano aakwe. Asike Samuyele, wamwaambila Saulu kuti wabisya. Samuyele wati: ‘Jehova ulasala uumbi muntu kuba mwami wa Isilayeli.’
Muciindi buyo cisyoonto Saulu alimwi wabisya kale. Aboobo Samuyele wamwaambila kuti: ‘Ncibotu kulemeka Jehova ikwiinda kumupa cipego cambelele iinda kubota. Akaambo kakuti wabisya kuli Jehova, Jehova tako kukuleka kuti utolelele kuba mwami wa Isilayeli.’
Tulakonzya kwiiya ciiyo cibotu kuli ceeci. Cilatutondezya mbociyandika kapati lyoonse kuswiilila Jehova. Alimwi cilatondezya kuti muntu wakali kabotu mbuli Saulu, ulakonzya kucinca akuba muntu mubi. Tatuyandi kuba babi, hena tulayanda?
1 Samuyele caandaano 9 kusikila ku 11; 13:5-14; 14:47-52; 15:1-35; 2 Samuyele 1:23.
Mibuzyo
- Ncinzi Samuyele ncacita acifwanikiso, alimwi nkaambo nzi?
- Nkaambo nzi Jehova ncamuyandila Saulu, alimwi ino Saulu muntu uuli buti?
- Ngwani zina mwana musankwa wa Saulu, alimwi ncinzi ncaacita mwana?
- Nkaambo nzi Saulu ncaapeda cituuzyo muciindi cakuti amulindile Samuyele kuti ape nguyo?
- Nziiyo nzi nzyotukonzya kwiiya kucibalo ca Saulu?
Mibuzyo aimwi
- Bala 1 Samuyele 9:15-21 a 10:17-27.
Mbuti kutalisumpula kwa Saulu mbokwakamugwasya kutabinda kucita cintu cili coonse bantu bamwi nibakali kumufwubaazya? (1 Sam. 9:21; 10:21, 22, 27; Tus. 17:27)
- Bala 1 Samuyele 13:5-14.
Ncibi nzi Saulu ncaakacita ku Giligala? (1 Sam. 10:8; 13:8, 9, 13)
- Bala 1 Samuyele 15:1-35.
Ncibi nzi cipati Saulu ncaakacita kuli Agagi mwami wa Amaleki? (1 Sam. 15:2, 3, 8, 9, 22)
Mbuti Saulu mbwaakali bosya-bosya kukulubizya kwakwe? (1 Sam. 15:24)
Nkucenjezyegwa kuli buti sunu nkotweelede kubikkila maano notwapegwa lulayo? (1 Sam. 15:19-21; Int. 141:5; Tus. 9:8, 9; 11:2)
