КӨРЕМ, Самуи́л бо кижиниң бажынче үс кудуп тур. Хаан кылдыр шилиттинген кижини көргүзер дээш, черле ынчаар кылыр турган. Сау́лдуң бажынче үс кударын Самуи́лге Иегова дужааган. Ол үс бир онзагай болгаш чигирзиг чыттыг.

Сау́л бодун хаан болур төлеп чок деп бодап турар. ‘Изра́ильде эң-не биче, Вениами́нниң төрел бөлүүнден мен,— деп, Самуи́лге ол чугаалаан.— Чүге мени хаан болур сен деп, чугаалап тур сен?’ Сау́л бодун өрү көрдүнмес боорга, ол Иегованың сеткилинге таарышкан. Ынчангаш Ол Сау́лду хаан кылдыр шилип алган.

Херек кырында Сау́л кандыг-бир ядыы болгаш бөдүүн кижи эвес-тир. Ол бай өг-бүледен үнген, ол дыка чараш база узун эр кижи-дир. Изра́ильде шупту улустан 30 сантиметр бедик чыгыы кижи-дир! Оон ыңай Сау́л дыка дүрген маңнаар, база ол дыка күштүг кижи-дир. Иегова хаан кылдыр Сау́лду шилип ап турар боорга, чон өөрүп турар. ‘Хаан делгерезин!’ — деп шупту алгыржып эгелээн.

Изра́ильдиң дайзыннары черле күштүг болгай. Олар биеэгизи ышкаш изра́ильчилерге хөй халаптар эккеп турар. Сау́л хаан апарган соонда, удаваанда оларга удур аммончулар тура халаан. Ынчалза-даа Сау́л улуг шериг чыггаш, аммончулар-биле тулчуушкунну ойнап алган. Ынчангаш Сау́л хаан апарган боорга, чон өөрүп турар.

Ол чылдар дургузунда Сау́лдуң башкарылгазының адаанга Изра́иль хөй катап тиилеп турар. Сау́лдуң Ионафа́н деп аттыг дидим оглу база бар. Изра́ильге хөй тулчуушкуннар ойнап алырынга Ионафа́н база дузалажып турар. Филисти́мчилер ам-даа изра́ильчилерниң эң-не каржы дайзыннары бооп турар. Бир катап элээн каш муң филисти́мчилер изра́ильчилер-биле тулчур дээш келгеннер.

Самуи́л келгеш, Иеговага белек-өргүл кылбаан шаанда, Сау́лга манаарын дужааган. Ынчалза-даа Самуи́л үр келбейн турар. Филисти́мчилер тулчуушкунну эгелей бээринден корткаш, Сау́л боду өргүлдү эккелген. Адак сөөлүнде Самуи́л чедип келгеш, Сау́лду дыңнангыр эвези дээш сойгалаан. ‘Иегова Изра́ильге өске хаанны шилип алыр’,— деп, Самуи́л чарлаан.

Сөөлзүредир Сау́л база катап дыңнангыр эвес болган. Ынчангаш Самуи́л аңаа чугаалаан: ‘Эң дээре дээн хойлардан белек бээринден артык, Иеговага дыңнангыр болуру дээре. Иегованы дыңнавааның дээш, Иегова сени Изра́ильдиң хааны кылдыр арттырбас’.

Бо чүүлден бис хөйнү өөренип ап болур бис. Иегованы кезээде дыңнаары кайы-хире чугулазын бо чүүл көргүзүп турар. Оон ыңай эки кижи безин, чижээ Сау́л ышкаш, өскерилгеш, багай апарып болур деп, бо чүүл көргүзүп турар. А бис багай болуксавайн турар болгай бис, ындыг аа?