KʼELAVIL li Samuele yakal ta smalbe aseite ta sjol li vinik leʼe. Liʼe jaʼ jech ta spasbeik li buchʼu ta stʼujik sventa ta x-och ta ajvalile. Li Samuele albat yuʼun Jeova ti akʼo smalbe aseite ta sjol li Saule. Leʼe jaʼ jun aseite ti chiʼmuan yikʼe.

Li Saule mu xchʼun mi xtojob xa ta ajvalilal. Li voʼone likemun tal ta snitilulal Benjamín, jaʼ li mas bikʼit ta skotol Israele. ¿Kʼu yuʼun cha val ti chi kʼot ta ajvalilale?, xut li Samuele. Lek ch-ilat yuʼun Jeova li Saule, yuʼun mu mukʼuk chaʼi sba mi jaʼuk tsots skʼoplal chaʼi sba. Jech oxal ta stʼuj sventa chkʼot ta ajvalil.

Pe li Saule mu meʼon vinikuk mi jaʼuk kʼox vinik. Likem tal ta jun jkʼulej utsʼ-alalil, lek alakʼ sba vinik xchiʼuk lek natil vinik. ¡Ta snekeb noʼox ta xikta komel li xchiʼiltak ta Israele! Li Saule toj lek snaʼ x-anilaj xchiʼuk toj lek tsots. Li krixchanoetike xmuyubajik ta skoj ti tʼujbatik yuʼun Jeova sventa ajvalilal li Saule. Xi lik avanikuk skotolike: ¡Toj lek li ajvalil kuʼuntike!, xiik.

Li yajkontratak Israele yokel to toj tsotsik. Mu toʼox sjaliluk yochel ta ajvalil li Saule, li j-amonetike bat spasik leto ta skontra li Israele. Pe li Saule la stsob ep yajsoltarotak, la stsal li j-amonetike. Li jteklume xmuyubajik ti jaʼ ch-ajvalilaj yuʼunik li Saule.

Li jabiletike ch-echʼ. Li ta jabiletik taje li Saule ta sbeiltas j-israeletik sventa chkuch yuʼunik li ta pas letoetike. Li Saule oy jun skerem ti tsots yoʼontone, jaʼ sbi Jonatán. Li Jonatán eke la skolta li j-israeletik sventa chkuch yuʼunik li ta pas letoetike. Li jfilistaetike jaʼ yokel-o yajkontra Israel ti mas toj chopolike. Jun kʼakʼal, ta smilaltak noʼox jfilistaetik tal spasik leto ta skontra li Israele.

Li Saule albat yuʼun Samuel ti akʼo smala sutal sventa ta xichʼ chikʼbel smoton li Jeovae. Pe li Samuele muʼyuk xvul ta anil. Li Saule ta xiʼ, jaʼ ti mi la slikesik noʼox pas leto li jfilistaetike, jaʼ yuʼun lik xchikʼbe stuk li smoton Diose. Kʼalaluk kʼot li Samuel ta mas tsʼakale, la jyalbe Saúl ti muʼyuk la xchʼun mantale. Li Jeovae ta stʼuj yan krixchano sventa ch-och ta ajvalilal yuʼun Israel, xi li Samuele.

Ta mas tsʼakal noxtok, li Saule muʼyuk la xchʼun mantal. Xi albat yuʼun li Samuele: Jaʼ mas toj lek ti ta jchʼunbetik smantal li Jeovae, jaʼ mu sta ti ta jchikʼbetik smotonin li lekil chijetike. Ta skoj ti muʼyuk la achʼunbe smantal li Jeovae, muʼyuk xa cha tun yuʼun ta ajvalilal ta Israel.

Ta sventa taje oy kʼusi tsots skʼoplal xuʼ jchantik. Chakʼ kiltik ti tsots skʼoplal skʼan jchʼunbetik-o smantal li Jeovae. Jech noxtok, chakʼ kiltik, ti manchuk mi lek toʼox li jun krixchano kʼuchaʼal Saule, xuʼ spas ta chopol krixchano. ¿Mi mu jechuk ti mu jkʼantik jech chkʼot ta jtojolaltik eke?