Tantara 56

Ampanjaka Voanalohany Tamin’Israely

ZAHAVA Samoela man̈idin̈y menaka amy lohan’ny lelahy io. Karaha io fataon-drô ahaizan̈a fa nifidin̈y ampanjaka olo araiky. Jehovah nan̈iraka Samoela han̈idin̈y menaka amy lohan’i Saoly. Nisy menaka man̈itry fatao izio tamy zen̈y.

Saoly tsy nino izy man̈eva atao ampanjaka. Volan̈iny tamy Samoela: ‘Zaho taranaka Benjamina, olo farany hely amin’Israely. Ke nan̈ino anao mivolan̈a fa zaho hatao ampanjaka?’ Jehovah tia Saoly, fôtony izy tsy poerapoera. Zen̈y nahavy Jehovah nifidy izy hatao ampanjaka.

Kanefa Saoly tsy olo masikiny, sady tsy olo hely zen̈y. Izy zanaka mpan̈arivo, baka iô koa izy zatôvo sady lava. Izy farany lava tan’Israely tan̈y! Saoly mahafaka lomoay, baka iô fatatra be. Jehovah koa fa nifidy Saoly hatao ampanjaka, olo jiaby ravoravo. Volan̈in-drô: ‘Ho lava havilaoman̈a anao ampanjaka!’

Fahavalon-drô Israelita aby io koa mba maro fatatra. Irô mbala nampijaly Israelita aby io fo. Tsy ela tafaran’i Saoly nifidin̈y ampanjaka in̈y, Amônita aby io navy hiady tamin-drô. Saoly baka tiô namory maramila maro, ke resy Amônita aby io. Olo jiaby ravoravo tamy raha nataon’i Saoly ampanjaka zen̈y.

Tan̈atin’ny taon̈o taon̈o, Saoly ndreky Israelita aby io nandresy fo, isaka niady tamy fahavalon-drô. Saoly koa nanan̈a zanaka lelahy tsy navozovozo. Jonatana an̈arany. Jonatana io nan̈ampy irô handresy tamin’ady maro nataon-drô. Filistiny aby io tamy zen̈y mbala fahavalon’Israelita farany ratsy fan̈ahy. Andra araiky, Filistiny arivoarivo navy hiady tamin-drô Israelita aby io.

Samoela nivolan̈a tamy Saoly, izy mila miambin̈y Samoela avy han̈atriky sôron̈o amian̈a Jehovah. Kanefa Samoela ela vo navy. Saoly navozo tsao Filistiny aby io manampôno ady, ke nalainy sôron̈o amian̈a Jehovah in̈y, naterin’izy zaraiky fo. Samoela amy zay koa fa navy, nivolan̈iny fa Saoly tsy nan̈araka volan̈a. Nambarany baka tiô: ‘Jehovah hifidy olo hafa atao ampanjakan’Israely.’

Tsy elan’izin̈y, Saoly tsy nan̈araka volan̈a koa. Ke Samoela nivolan̈a taminany: ‘Man̈araka volan̈a Jehovah ten̈a tsara toizay man̈amia izy ôndrikôndriky farany tsara. Ke anao tsy nan̈araka volan̈a Jehovah, anao fa tsy ataony ampanjakan’Israely eky.’

Misy fianaran̈a tsara azotsika boaka amy zen̈y. Atsika mila man̈araka volan̈a Jehovah fo. Baka iô koa, olo tsara fan̈ahy mety hivadiky ratsy fan̈ahy, karaha nataon’i Saoly in̈y. Tsy tiatsika hanjary ratsy fan̈ahy, tsy zen̈y?

1 Samoela toko faha-9 ziska toko faha-11; 13:5-14; 14:47-52; 15:1-35; 2 Samoela 1:23.