AMLOLE Samuyelejo, akutaga mawuta pamtwe pa mundujo. Yeleyi ni yaŵamtendaga mundu pakulosya kuti amsagwile kuŵa mwenye. Yehofa akumsalila Samuyele kuti amtaje Sauli mawuta pamtwe. Gali mawuta gapajika gakununjila cenene.

Sauli nganaganisyaga kuti jwalakwe ali mundu jwakuŵajilwa kuŵa mwenye. Jwalakwe akumsalila Samuyele kuti: ‘Une ndili jwa mtundu wa Benjamini, mtundu waunandi mnope mu Yisalayeli. Ligongo cici akuŵeceta kuti cinjiŵa mwenye?’ Yehofa akumnonyela Sauli ligongo ngakusalikwesya kapena kuliwona kuti ali mundu jwakusosekwa. Lyeleli ni ligongo lyakwe akumsagula kuŵa mwenye.

Nambo Sauli nganaŵa jwakulaga kapena jwakuwoneka jwamnandi. Jwalakwe ŵatyocelaga muliŵasa lyakusicila, ŵaliji mundu jwakuwoneka cenene, soni jwamlewu. Ŵaliji mundu jwamlewu kupunda jwalijose mu Yisalayeli! Sauli ŵakombolagasoni kuwutuka mwacitema, soni ŵaliji mundu jwamacili mnope. Ŵandu akusangalala kuti Yehofa asagwile Sauli kuŵa mwenye. Wosopewo akuŵeceta mwakwesya maloŵe acitiji: ‘Akole umi welewu mwenye!’

Acimmagongo ŵa Ayisalayeli akwendelecela kuŵa ŵamacili mnope kupundana nikalakose. Akwendelecela kwalagasya mnope Ayisalayeli. Sauli pagambile kuŵa mwenye, Aamoni akwika kukuputana nawo ngondo. Nambo Sauli akusonganganya likuga lyekulungwa lya asilikali, ni kwagomeka Aamoni. Yeleyi yikwatendekasya ŵandu kusangalala kuti Sauli ali mwenye jwawo.

Payikumala yaka, Sauli akwalongolela Ayisalayeli kupunda ngondo syejinji syakulimbana ni acimmagongo ŵawo. Sauli akukolasoni mwanace jwakulimba mtima lina lyakwe Yonatani. Yonatani nombenajo akwakamucisya Ayisalayeli kupunda ngondo syejinji. Afilisiti akwendelecelape kuŵa acimmagongo ŵakogoya ŵa Ayisalayeli. Lisiku line masausande ga Afilisiti gakwika kukulimbana ni Ayisalayeli.

Samuyele akumsalila Sauli kuti amlinde kaje jwalakwe mpaka pacayice ni kupeleka mbopesi, wawuli mtuka kwa Yehofa. Nambo Samuyele akucelewa kwika. Sauli akogopa kuti Afilisiti cajitande ngondo, ni jwalakwe akupeleka mbopesi jila jika. Pakwika Samuyele, akumsalila Sauli kuti nganapikanila. Samuyele akuŵeceta kuti: ‘Yehofa cacisagula mundu jwine kuŵa mwenye jwa Ayisalayeli.

Kanekosoni Sauli ngakupikanila. Sambano Samuyele akumsalila kuti: ‘Kumpikanila Yehofa kuli cenene kupundana ni kumpa mtuka wa ngondolo syambone. Ligongo lyakuti nganimumpikanila Yehofa, Yehofa ngasamkunda kwendelecela kuŵa mwenye jwa Ayisalayeli.’

Pelepa mpaka tulijiganye lijiganyo lyambone. Tukukuwona kusosekwa kwa kumpikanila Yehofa ndaŵi syosope. Nambosoni tukuyiwona kuti mundu jwambone, mpela mwaŵaŵelele Sauli, komboleka kusinda nikuŵa mundu jwakusakala. Nambo m’weji ngatukusaka atapanandi kuŵa mundu jwakusakala, ngati m’yoyo?