Historia 56

Saúl primé rey stiʼ Israel

BIIYADXÍ Samuel cundaate aceite ique hombre ca. Ndiʼ nga ni rúnicabe tuuxa ti guiluíʼ de que maʼ bibí para gaca rey. Jiobá gúdxibe Samuel gundaate aceite ique Saúl. Ndiʼ nga ti aceite risaca ne rindáʼ naxhi.

Saúl guníʼ ique de que cadi nacháʼhuipeʼ para gaca rey, ne rábibe Samuel, de tribu stiʼ Benjamín nga naa ni jma nahuiiniʼ de Israel. Xiñee naluʼ de que zacaʼ rey pue. Jiobá riuláʼdxibe Saúl para gaca rey purtiʼ cadi nuu diʼ gaca naróʼ ne guisaca. Pur nga ribibe Saúl para gaca rey.

Peru Saúl cadi pobre diʼ laa ne cadi nahuiiniʼ diʼ. Binnilídxibe guizáʼ napa bidxichi, ne guizáʼ galán laabe ne nasoobe. ¡Ridíʼdibe biaʼ 30 centímetru lu tutiica hombre de Israel! Saúl laaca naca ti hombre guizáʼ nadipaʼ ne guizáʼ ruxooñeʼ. Ca binni que biéchecaʼ stale purtiʼ gulí Jiobá Saúl para gaca rey. Guirácabe bicaacabe ridxi: ¡Guisaca rey ca!

Ca xhenemigu ca israelita nadíparuʼ nuucaʼ. Qué nindaa diʼ de guca Saúl rey la? ca ammonita bicaalucaʼ laacabe. Peru Saúl rutopa stale xpinni ne runi ganarbe ca ammonita. Guidxi que riéchecaʼ purtiʼ nápacaʼ Saúl casi rey sticaʼ.

Ridiʼdiʼ ca iza que la? Saúl biʼniʼ ganarnebe ca israelita stale guendaridinde. Saúl laaca napa ti xiiñiʼ nadxibalú, láʼ Jonatán. Ne Jonatán racané guidxi Israel guni ganar stale guendaridinde. Ca filisteu nácarucaʼ ca ni jma xhenemigu ca israelita. Ti dxi, stálepeʼ filisteu zeeda tindenecaʼ ca israelita.

Samuel gúdxibe Saúl cueza dede ora gueedabe para guutibe ti manihuiiniʼ para gudiibe Jiobá. Peru Samuel rindaa. Saúl cadxibi guzulú ca filisteu que tíndecaʼ, ngue runi rireebe ne ruutibe ti manihuiiniʼ laapebe ne rudiibe laa Jiobá. Ora bedandá Samuel la? gúdxibe Saúl de que qué nuzuubaʼ diʼ diidxaʼ. Jiobá zabí sti binni para gaca rey stiʼ Israel, na Samuel.

Qué nindaa diʼ, Saúl qué nuzuubaʼ diʼ diidxaʼ sti biaje. Samuel rabi laabe: Jma galán nga guzuubaluʼ stiidxaʼ Jiobá que gusigáʼdeluʼ laabe ti dendxuʼ ni jma galán. Cumu qué guzuubaluʼ stiidxaʼ Jiobá la? laabe maʼ qué západibe lii casi rey stiʼ Israel.

De ni bizaaca ca la? riziidinu xiixa. Culuíʼ ni laanu de que risácapeʼ nga guzuubanu stiidxaʼ Dios guiráʼ ora. Laaca culuíʼ ni laanu de que ti binni nachaʼhuiʼ casi guca Saúl ca la? zanda gaca malu. ¡Laanu qué ziuudiʼ dxi gácanu zacá njaʼ!

1 Samuel, capítulo 9 hasta 11; 13:5-14; 14:47-52; 15:1-35; 2 Samuel 1:23.