¿PEAFUYMI chem dungu mu rupay? Ti pichi (püchü) weche wentru montulfi feychi pichi ufisa ti oso mu. Ti kulliñ oso yeniey ti pichi ufisa ñi iyafiel. Welu ti pichi weche wentru inafi, ka montulfi ti pichi ufisa oso ñi wün mu. ¡Ka witrapüralu ti oso, ti pichi weche wentru langümfi! Ka antü mu ti pichi weche wentru montulfi kiñe ufisa kiñe trapial (fücha peñi) mew. ¿Llükanche ngelay ti pichi weche wentru, feyngelay am chi? ¿Eymi kimimi iney ngen tüfachi pichi weche wentru?

Ti weche wentru David tati. Kidu müley Belen waria mew. Ñi laku Obed pingefuy, Rut ka Boas ñi yall. ¿Tukulpaymi fey engu? Ka David ñi chaw, Jese pingey. David inaduamkefuy ñi chaw ñi pu ufisa. Choyüngey David, rupalu mari tripantu mu, Jewba dew dullifilu (ngümintufilu) Saul ñi rey ngerpual.

Akuy chi antü Jewba feypifi ta Samuel: ‘Nütunge pichin doy küme aseyte, fey amunge Jese ñi ruka, Belen waria mew. Dullifiñ (ngümintufiñ) kiñe ñi pu fotüm mu ñi rey ngerpual.’ Samuel pefilu Eliab, Jese ñi wünen fotüm, feypi: ‘Rüf tüfa pe no’, pi. Welu Jewba feypieyew: ‘Lelikifilnge ñi doy fütra ngen, ka ñi küme ad ngen. Dullilafiñ ñi rey ngerpual.’

Fey mew Jese mütrümfi ñi fotüm Abinadab, ka yelelfi ta Samuel. Welu Samuel feypi: ‘No, Jewba ka dullilaeyew (ngümintulaeyew) tati.’ Fey wüla, Jese yelelfi ñi fotüm Sama. ‘No, Jewba ka dullilaeyew tüfa,’ pi Samuel. Jese yelelfi tañi regle pu fotüm ta Samuel, welu Jewba dullilay (ngümintulay) kiñe no rume. Fey mu ramtuy Samuel: ‘¿Kom tüfachi fotüm nieymi am?’

‘Mülewey doy wechengelu. Welu wekun müley, inaduamniey pu ufisa,’ pi Jese. Küpalelngelu David, Samuel pefi ñi küme ad ngen. ‘Tüfa tati,’ pi Jewba. ‘Wütrünakümelfinge tati aseyte.’ Ka femngechi femi Samuel. Mülen antü mu, David rey ngerpuy Israel mu.