ছবিখনত কি দেখিছা বাৰু? ল’ৰাটোৱে ভালুকৰ মুখৰপৰা ভেড়া পোৱালিটোক ৰক্ষা কৰিলে। ভালুকটোৱে ভেড়া পোৱালিটোক খাবলৈ জাকৰপৰা লৈ গৈছিল। কিন্তু ল’ৰাটোৱে ভালুকটোৰ পিছে পিছে খেদি গৈ ভেড়া পোৱালিটোক উদ্ধাৰ কৰিলে। ভালুকে ল’ৰাটোক উভতি আক্ৰমণ কৰাত, সি তাক বধ কৰিলে। আন এক সময়ত ল’ৰাটোৱে ভেড়া এটাক সিংহৰ মুখৰপৰা উদ্ধাৰ কৰিছিল। এই ল’ৰাটো বৰ সাহসী নহয়নে? তাৰ নাম কি হয় তুমি জানানে?

ল’ৰাটোৰ নাম হৈছে দায়ূদ আৰু তাৰ ঘৰ বৈৎলেহমত। দায়ূদৰ ককাদেউতাৰ নাম আছিল ওবেদ। ওবেদ হৈছে ৰূথ আৰু বোৱজৰ পুত্ৰ। ৰূথ আৰু বোৱজৰ কথা তোমাৰ নিশ্চয় মনত আছে। দায়ূদৰ দেউতাকৰ নাম হৈছে যিচয়। দায়ূদে দেউতাকৰ ভেড়াবোৰক চোৱা-চিতা কৰে। যিহোৱাই চৌলক ৰজা হিচাপে নিৰ্ব্বাচন কৰাৰ ১০ বছৰৰ পাছত দায়ূদৰ জন্ম হৈছিল।

যিহোৱা ঈশ্বৰে ভাববাদী চমূৱেলক ক’লে: ‘তুমি সুগন্ধিযুক্ত তেল লগত লৈ বৈৎলেহমত থকা যিচয়ৰ ঘৰলৈ যোৱা। মই তেওঁৰ পুত্ৰবিলাকৰ এজনক ৰজা হ’বলৈ নিৰ্ব্বাচন কৰিছোঁ।’ চমূৱেলে যিচয়ৰ ঘৰলৈ আহি তেওঁৰ বৰ পুত্ৰ ইলীয়াবক দেখি নিজকে ক’লে: ‘নিশ্চয় এই মানুহজনেই যিহোৱাৰ অভিষিক্তজন।’ কিন্তু যিহোৱাই চমূৱেলক ক’লে: ‘তুমি ইয়াৰ মুখ আৰু দেহলৈ দৃষ্টি নকৰিবা। কাৰণ মই তাক অগ্ৰাহ্য কৰিলো।’

যিচয়ই নিজৰ দ্বিতীয় পুত্ৰ অবীনাদবক চমূৱেলৰ ওচৰলৈ আনিলে। কিন্তু চমূৱেলে উত্তৰ দিলে: ‘যিহোৱাই ইয়াকো মনোনীত কৰা নাই।’ ইয়াৰ পাছত যিচয়ই তেওঁৰ তৃতীয় পুত্ৰ চম্মাক লৈ আনিলে। চমূৱেলে ক’লে: ‘যিহোৱাই ইয়াকো মনোনীত কৰা নাই।’ এজন এজনকৈ যিচয়ই নিজৰ সাতজন পুত্ৰক চমূৱেলৰ ওচৰলৈ আনিলে। কিন্তু যিহোৱাই এই সাতজনৰ ভিতৰত কাকো নিৰ্ব্বাচন নকৰিলে। চমূৱেলে যিচয়ক সুধিলে: ‘তোমাৰ ল’ৰা এইকেইটাইনে?’

যিচয়ই উত্তৰ দিলে: ‘কেৱল সৰুজনহে বাকী আছে। সি ভেড়াবোৰক চৰাইছে।’ দায়ূদক চমূৱেলৰ ওচৰলৈ মাতি অনা হ’ল। চমূৱেলে দায়ূদক দেখি আচৰিত হ’ল, কিয়নো দায়ূদ দেখিবলৈ বৰ সুন্দৰ আছিল। যিহোৱাই চমূৱেলক ক’লে: ‘উঠা, ইয়াকে অভিষেক কৰা। কিয়নো ইয়েই সেই মানুহ।’ ঈশ্বৰৰ আজ্ঞা অনুসৰি চমূৱেলে দায়ূদক অভিষেক কৰিলে। সঠিক সময়ত দায়ূদ ইস্ৰায়েলৰ ৰজা হ’ব।