NAHIHILING mo kun anong nangyari? Ilinigtas kan solterito an sadit na korderong ini kan tabagon * iyan kan oso. Linapag kan solterito an oso, asin inagaw an kordero sa nguso kaiyan. Kan dasmagan siya kan oso, ginumol niya iyan asin ginadan! Sa saro pang pagkakataon, sarong karnero an ilinigtas niya sa leon. Bako daw na makusog an buot kan solteritong ini? Bisto mo siya?

Siya si David. Nakaistar siya sa banwa nin Betlehem. An lolo niya iyo si Obed, an aki ni Ruth asin Boaz. Natatandaan mo sinda? An ama ni David iyo si Jese. Inaataman ni David an mga karnero kan saiyang ama. Namundag siya sampulong taon pakatapos pilion ni Jehova si Saul na magin hadi.

Pag-abot nin panahon, sinabi ni Jehova ki Samuel: ‘Magkua ka nin espesyal na lana asin magduman ka sa harong ni Jese sa Betlehem. Pinili ko an saro sa mga aki niya para magin hadi.’ Kan mahiling ni Samuel an pinakamatuang aki ni Jese na si Eliab, sinabi niya sa sadiri niya: ‘Iyo na ini an pinili ni Jehova.’ Pero sinabi saiya ni Jehova: ‘Dai ka maghiling sa langkaw asin kaguwapuhan niya. Bako siya an pinili ko.’

Kaya inapod ni Jese an aki niyang si Abinadab. Pero sinabi ni Samuel: ‘Bako siya an pinili ni Jehova.’ Sunod, iprinesentar ni Jese si Shamah. ‘Bako, bako siya,’ an sabi ni Samuel. Dinara ni Jese an pitong aki niyang lalaki sa atubangan ni Samuel, pero mayo sa sainda an pinili ni Jehova. ‘Ini na gabos an aki mong lalaki?’ an hapot ni Samuel.

‘May saro pa, su kangudhan. Mayo siya digdi ta pig-aataman su mga karnero,’ an sabi ni Jese. Kan apudon si David, nahiling ni Samuel na may itsura an solterito. Nagsabi si Jehova: ‘Siya na! Bubuan mo siya kan lana.’ Kaya iyan an ginibo ni Samuel. Maabot an panahon, si David an maghahadi sa Israel.