MONA ifilecitika pa cikope. Uyu umwaice alipuswishe aka akaana ka mpaanga kuli bere. Bere yalisendele akaana ka mpaanga pa kuti ikalye. Lelo uyu umwaice alibutukileko no kupokolola akaana ka mpaanga ku kanwa ka kwa bere. Ilyo bere yaiminine, uyu umwaice ali-ikete no kuyuma, yafwa no kufwa! Pa nshita imbi, uyu umwaice alipuswishe impaanga imo ku nkalamo. Bushe uyu umwaice tali uwashipa? Bushe walishiba ishina lyakwe?

Ni Davidi. Aleikala mu musumba wa Betelehemu. Davidi ali mwishikulu wa kwa Obedi, umwana wa kwa Ruti na Boasi. Bushe ulebebukisha? Wishi wa kwa Davidi ali ni Yese. Davidi alesunga impaanga sha ba wishi. Davidi afyelwe pa numa ya myaka 10 ukutula apo Yehova asalile Shauli ukuba imfumu.

Mu kuya kwa nshita, Yehova aebele Samwele ati: ‘Buula amafuta yaibela no kuya ku ng’anda ya kwa Yese ku Betelehemu. Ninsala umwana wakwe umwaume ukuba imfumu.’ Ilyo Samwele amwene Eliabu, umwana wa kwa Yese umukalamba, mu mutima atile: ‘Nangu cibe shani, uyu wine eo Yehova asalile.’ Lelo Yehova amwebele ati: ‘Wimona ubutali ne fyo aweme pa menso. Te o nsalile ukuba imfumu.’

E ico Yese aitile Abinadabu umwana wakwe no kuya nankwe kuli Samwele. Lelo Samwele atile: ‘Awe, na o te o Yehova asalile ukuba imfumu.’ Lyena Yese alangile Samwele umwana wakwe Shama. Na kabili Samwele atile: ‘Awe, no yu wine te o Yehova asalile.’ Abana abo Yese atwele kuli Samwele basukile bafika 7, lelo Yehova tasalilepo nangu umo. Samwele aipwishe ati: ‘Bushe aba, e bana fye abaume abo wakwata?’

Yese ayaswike ati: ‘Kwashala umwana umo umwaice pali bonse. Lelo talipo pantu alecema impaanga.’ Ilyo Yese atwele Davidi kuli Samwele, Samwele alimwene ukuti Davidi alemoneka bwino sana. Yehova atile: ‘Uyu wine e o nsalile. Mupongolwele amafuta pa mutwe.’ Ifi fine e fyo Samwele acitile. Inshita yali no kufika ilyo Davidi ali no kuba imfumu ya bena Israele.