Maana 57nan

Ala ye Dawuda sugandi

I Y’A ye fɛn min kɛra wa? Kamalennin ye nin sagadennin kisi ka bɔ ursiwara bolo. Ursiwara tun nana sagadennin ta ka taa n’a ye walisa k’a dun. Nka, kamalennin bolila ursiwara kɔ, ka sagadennin bɔ a da la. Ursiwara wulila k’i jɔ kamalennin kama tuma min na, kamalennin y’a bugɔ k’a faga. Waati dɔ wɛrɛ la tuguni, waraba nana saga dɔ minɛ, kamalennin ye saga bɔ waraba bolo. Nin kamalennin ja ka gɛlɛn! Tiɲɛ tɛ? I bɛ o kamalenin dɔn wa?

Dawuda de don. A sigilen bɛ Bɛtilɛhɛm dugu kɔnɔ. A mɔkɛ tun ye Obɛd ye. Obɛd tun ye Ruti ni Boaz denkɛ ye. I hakili bɛ Ruti ni Boaz la wa? Dawuda fa ye Jese ye. Dawuda ye a fa ka sagagɛnna ye. Jehova ye Saul kɛ masakɛ ye tuma min na, san 10 o kɔfɛ, Dawuda wolola.

Don dɔ la Jehova y’a fɔ Samuɛl ye ko: ‘Tulu kɛrɛnkɛrɛnnen ta ka taa Jese ka so kɔnɔ Bɛtilɛhɛm. Ne ye a denkɛ kelen ɲɛnatɔmɔ k’a kɛ masakɛ ye.’ Samuɛl ye Jese denkɛw bɛɛ la kɔrɔbalen Eliab ye tuma min na, a y’a fɔ a yɛrɛ kɔnɔ ko: ‘Siga t’a la, nin de ye Jehova ka ɲɛnatɔmɔlen ye.’ Nka, Jehova y’a fɔ a ye ko: ‘I kana a lajɛ ko a ka jan ani ko a cɛ ka ɲi, ne ma a ɲɛnatɔmɔ k’a kɛ masakɛ ye.’

O la sa, Jese ye a denkɛ Abinadab wele ka na a jɔ Samuɛl ɲɛkɔrɔ. Nka Samuɛl ko: ‘Ayi, Jehova ma nin fana ɲɛnatɔmɔ.’ O kɔfɛ, Jese nana ni a denkɛ Sama ye. Samuɛl ko: ‘Ayi, Jehova ma nin fana ɲɛnatɔmɔ.’ Jese nana ni a denkɛ wolonwula ye o cogo la Samuɛl ɲɛkɔrɔ, nka Jehova ma u si ɲɛnatɔmɔ. Samuɛl ye Jese ɲininka ko: ‘Yali i denw bɛɛ ye ninnu de ye wa?’

Jese ko: ‘U bɛɛ la dɔgɔmannin bɛ yen, nka a taara sagagɛn na.’ U nana ni Dawuda ye tuma min na, Samuɛl y’a ye ko a cɛ ka ɲi. Jehova ko: ‘Nin de don. Tulu bɔn a kunkolo kan.’ Samuɛl y’a kɛ ten. O kɔrɔ ye ko Dawuda bɛna kɛ Israɛl masakɛ ye don dɔ la.

1 Samuɛl 17:​34, 35; 16:​1-13.