Abahüdaguni 57

Lanúadiruni Bungiu Dawidi

ARIHABEI le asuseredubei. Sefulá irahü lira liraüraü mudún le luéi osu. Lanügüñein yebe osu liraüraü mudún lun léigini. Gama lumoun aba lasigiruni irahü le osu, aba lesefuruni liraüraü mudún liyumulugugiñe. Dan le liñuragun osu, aba lagayuahan irahü luagu aba láfaruni hilagubei! Lidan amu ókaasion sefuti irahü le aban mudún luéi aban liñún. Ida liña barihin lun, ma ganigiti irahü le adügübalin katei burí le? Subuditi san bun katei lan irahü lira?

Dawidi lira. Belén lawinwanda. Owedi meha larugutibei, le tisaani Rudu luma Boosu. Haritaguabagiña san? Hesé lúguchibei Dawidi. Dawidi etenirubei houn lilügüniña lúguchi mudún. Diisi irumu lárigiñe lanúadiruni Heowá Saulu lun urúeime ligía nasirua lan Dawidi.

Chülüha lidaani lariñagun Heowá lun Samueli: ‘Barüba somu agülei espechaliti ábame bidin Belén lúbiñe Hesé. Anuadiráadina aban hádangiñe lirahüñü lun ligíaba lan urúei.’ Dan le larihini Samueli Eliabü, le furumiñeti liráü Hesé, aba lariñagun lúnguarügü: ‘Chóuruti ligía lan le.’ Gama lumoun aba lariñagun Heowá lun: ‘Metenirabá lun lumagadiñen, ni lun lúgubu, lugundun mama ligía nanúadirubei urúeime.’

Ábati lagúarun Hesé lun Abinadábü le liráü, aba lanügüni lun Samueli. Gama lumoun aba lariñagun Samueli: ‘Uá, mama giñe le lanúadirubei Heowá.’ Lárigiñe, aba giñe lanügüni Hesé liráü le gíribei Samá. ‘Uá, mama giñe ligía le lanúadirubei Heowá,’ liña Samueli. Barüti Hesé sedü hádangiñe lirahüñü lun Samueli, ani manúadirunti Heowá ni aban. ‘Añahan san sun birahüñü?’ liña lálügüdahan Samueli.

Aba lariñagun Hesé: ‘Lérügaali ñǘraütimagilibei, ani anihein bóugudi óunigiraña mudún.’ Dan le hanügüni Dawidi lun, aba larihin Samueli luagu magadiñe lan. Aba lariñagun Heowá ‘Ligía le, sebei agülei lábulugun.’ Aba ladügüni Samueli ítara. Lau lásügürün dan, Dawidiba urúei Ísüraeli.

1 Samueli 17:34, 35; 16:1-13.