ZEIDAH a rak tlung nan hmu maw? Hi ngakchiapate nih hi a tuu fate cu vompi kut in a rak khamh. Vompi cu a ra i tuu fate cu a lak i ei awk ah a kalpi. Sihmanhsehlaw ngakchiapa nih an hnu in a dawi hna i vompi kaa in tuu fate cu a khamh. Vompi nih a hun zuanhnawh tik ah ngakchia pa nih vompi cu a tlaih i thi lak in a vuak! A dang voikhat lio ah ngakchiapa nih tuu pakhat kha chindeih kut in a rak khamh ve cang. A ral a ṭha ngai mi ngakchia hrimhrim a si lo mei? Cu ngakchiapa cu aho a si ti nan hngal maw?

Amah cu tlangvalpa David a si. Amah cu Bethlehem khua ah a um. A pu cu Obed, Ruth le Boaz an fapa a si. Anmah kong cu nan hngal rih maw? Cun David a pa cu Jesse a si. David cu a pa tuu pawl a cawngh hna. David cu Jehovah nih siangpahrang si awk ah Saul a thimnak in kum 10 hnu ah a chuak mi a si.

A caan a tlin tik ah Jehovah nih Samuel sin ah: ‘Chiti cheukhat kha i lak law Bethlehem khua i Jesse inn ah khan va kal tuah. Amah fapa hna lak i pakhat kha siangpahrang caah ka thim cang!’ tiah a ti. Samuel nih Jesse fapa upa bik Eliab kha a hmuh tik ah: ‘Jehovah nih a thim mi cu amah hi a si ko lai,’ tiah a ruah. Sihmanhsehlaw Jehovah nih: ‘Zeitluk sang le dawh dah a si tu kha zoh hlah. Siangpahrang caah amah cu ka thim mi a si lo,’ tiah a chimh.

Cucaah Jesse nih a fapa Abinadab kha a auh i Samuel sin ah a rat pi. Sihmanhsehlaw Samuel nih: ‘A si lo, Jehovah nih amah zong hi a thim ṭhiamṭhiam lo,’ tiah a ti. Cu hnu ah Jesse nih a fapa Shammah kha a ratpi. ‘A si lo, Jehovah nih amah zong hi a thim ṭhiamṭhiam lo,’ tiah Samuel nihcun a ti rih. Jesse nih a fapale pasarih kha Samuel sin ahcun a ratpi hna nain Jehovah nihcun annih lak i pakhat hmanh kha a thim hna lo. ‘Na fapale cu mah vial lawng hi maw an si?’ tiah Samuel nih a hal.

‘A hniang bik pa pakhat a um rih,’ tiah Jesse nih a leh. ‘Asinain amah cu khualeng ah tuu a khal i a um lo,’ a ti. David cu an hun luh pi tik ah Samuel nih amah cu mi dawh ngai a si kha a hmuh. ‘Amah hi a si. Amah cung ah chiti kha toih tuah, tiah Jehovah nih a ti. Cubang in Samuel zong nih a tuah. Israel mi hna cung ah David siangpahrang a ṭuan lai nak caan a ra te lai.