¿BE DAGSA ibu ibmar gusa? We massigwa oveja mimmi bendasa. Oso, oveja mimmi gunnega sesana. Auggine, we massigwa balimagsa, geb un oveja mimmi gulleged naga gunai, bendasad. ¡Geb oso gwissi guargua, massigwa abin imasa, geb oburgwisad! Ibagwengi leónmar, oveja sesa gusmoga, geb we massigwa, oveja bendasbalid. Massigwa we ibmar imaggeg dobed sadder gebed, ¿insoa? ¿Be wisi, we massigwa doawa?

We massigwa nuga, David. Belén neggweburgi gudigusad. E dador nuga Obed, geb Obed e nandi nuga Rut, geb Obed e babdi nugad Booz. ¿Be we dulemar ebinsae? Degine, David e bab dina nugad Jesé. David, e babga ovejamar aggwedgi arbaed. Jehová, Saúl reyga onugsasad sorbali, 10 años gine David gwalulenoniggi.

Undar ibamar nanasadgi Jehová, Samuelga soge: ‘Aceite yeer yabbanned be sue, geb Belén neggweburse be nao, Jesé negyase. E massi wargwen an susa, reyga megega’. Samuel, Jesé e massi saglagined Eliabye nugad daggargua, binsasa: ‘Weer gebed’. Auggine Jehová ega sogsad: ‘Mer e dunguedgi be addaggo, geb mer e dagleged be dagbalo. An we dule sussulid reyga megega’.

Degsoggu, Jesé na e massi Abinadabse godsa, geb Samuelse senoniggi. Auggi Samuel soge: ‘Suli, Jehová we dule anba sussurbalid’. Sorba Jesé, e massi Sama nugadi senonibali. Samuel soge: ‘Suli, Jehová we dule anba sussurbalid’. Jesé e masmala wargugle Samuelse senoniggi, auggine Jehová wargwensaale sussuli. Geb Samuel egisdesunnad: ‘¿Wegi bela be masmala mergue?’.

Jesé soge: ‘Bibbigwadbi nabbi. Adi ovejamar aggwedi, negmagaba’. David senonimargua, Samuel dagsa we massigwa yeerdaglege. Geb Jehová ega soge: ‘Wee aadi. Aceite egi be eyoge’. Geb Samuel deyobi imasa. Sorbali, David reyga megnoniggoe Israelgi.