KANBELE nin filɛ, a ye sagaden dɔ bɔsi urusi wara daa la. O wara tun nana sagaden minɛ, a tun b’a fɛ k’a ɲimi. Nka, kanbele nin ye wara nɔgwɛn fɔɔ ka taga sagaden bɔsi a daa la. Wara wulila ka lɔ a kɔfɛ seenw kan, nka kanbele nin y’a minɛ k’a bugɔ k’a faga. Loon dɔ la tugun, a ye saga dɔ bɔsi jara daa la. Kanbele nin jaa ka gwɛlɛ dɛ, tiɲɛn tɛ? Nka, jɔn lo do?

Kanbele nin ye Dawuda lo ye. A siginin tun be Bɛtilehɛmu dugu kɔnɔ. A mamacɛ tun ye Obɛdi ye, o min tun ye Ruti ni Bowazi dencɛ ye. Yala i hakili be u la wa? Zese tun ye Dawuda facɛ ye. Dawuda tun b’a facɛ ka bɛgɛnw mara. Jehova ye Sayuli sugandi k’a kɛ masacɛ ye, saan 10 o kɔ, Dawuda wolola.

Loon dɔ la, Jehova y’a fɔ Samuyɛli ye ko: ‘Tulu kɛrɛnkɛrɛnnin dɔ ta ka taga Bɛtilehɛmu, Zese ka soo. Ne y’a dencɛ dɔ sugandi k’a kɛ masacɛ ye.’ Samuyɛli sera Bɛtilehɛmu ka Zese dencɛ fɔlɔ Eliyabu ye, a ko: ‘Jehova ye min sugandi, nin yɛrɛ yɛrɛ lo.’ Nka, Jehova y’a fɔ a ye ko: ‘I kana a filɛ a ɲɛda n’a janya ma, ne m’ale sugandi.’

Zese ye Abinadabu weele k’a yira Samuyɛli la. Samuyɛli ko: ‘Jehova ma nin fana sugandi.’ A ye Sama fana weele, ale nana, Samuyɛli ko: ‘Jehova ma nin fana sugandi.’ Zese y’a dencɛ wolonfila bɛɛ weele, u nana, Samuyɛli y’a fɔ ko Jehova ma u si sugandi. Samuyɛli ye Zese ɲininga ko: ‘I dencɛw bɛɛ lo ye nunu ye wa?’

Zese y’a jaabi ko: ‘U bɛɛ dɔgɔnin lo tora, ale be sagaw dɛndɛ kongo kɔnɔ.’ U tagara Dawuda weele ka na tuma min na, Samuyɛli y’a ye ko a cɛ ka ɲi. Jehova y’a fɔ Samuyɛli ye ko: ‘Ale lo, wuli ka tulu bɔn a kuun na.’ Samuyɛli y’o lo kɛ. O kɔrɔ tun ko Dawuda bena kɛ Israɛl ka masacɛ ye loon dɔ la.