O RAICA rawa na veika e yaco tiko e ke? Na cauravou oqo e vakabula na luvenisipi mai na pera. A kauta na luvenisipi na pera me lai kania. E cici muri rau na cauravou me vakabula na luvenisipi mai na gusu ni pera. Ni duri mai na pera, e vesuka qai mokuta mate! Ena dua tale na gauna a vakabula e dua na sipi mai na laione. E cauravou yaloqaqa dina. O kilai koya?

Oqo o Tevita. E tiko ena koro o Peceliema. Na tukana o Opeti na luve i Ruci kei Poasa. O se nanumi rau tiko? Na tama i Tevita o Jese. E dau vakatawa na sipi i tamana o Tevita. A sucu o koya ni oti e 10 na yabaki nona digitaki Saula me tui o Jiova.

Yaco na gauna sa qai kaya kina o Jiova vei Samuela: ‘Kauta na waiwai digitaki i Peceliema ina vale i Jese. Au sa digia e dua na luvena tagane me tui.’ Ni sa raici Iliapi na ulumatua tagane i Jese o Samuela, e kaya lo: ‘O koya oqo e digia o Jiova.’ Ia e kaya vua o Jiova: ‘Kua ni raica na nona totoka kei na kena balavu. Au sega ni digitaki koya me tui.’

Oti sa qai kacivi Epinatapi mai o Jese vei Samuela. E kaya o Samuela: ‘Sega, e sega ni digitaki koya o Jiova.’ Tarava, e lai kauti Sama mai. E kaya tale o Samuela: ‘Sega, e sega tale ga ni digi koya qo o Jiova.’ Sa kauti iratou mai e vitu na luvena tagane o Jese vei Samuela, ia e se sega ga ni dua vei iratou e digitaka o Jiova. E taroga o Samuela: ‘O iratou kece beka ga qo na luvemu tagane?’

E kaya o Jese: ‘O koya ga e gone duadua sa vo. Ia e se vakatawasipi tiko.’ Ni sa kau mai o Tevita, e raica o Samuela ni gonetagane totoka. E kaya o Jiova: ‘Sa o koya qo. Mo lumuti koya ena waiwai.’ Oqo sara ga na ka e cakava o Samuela. Ena yaco na gauna me na qai tui kina o Tevita e Isireli.