NDÉPA rehecha mbaʼépa oikóraʼe koʼápe? Ko mitãrusu osalva pe ovecha raʼy peteĩ ósogui. Pe óso oguerahámakuri ko ovecha raʼy hoʼu hag̃ua. Péro ko mitãrusu oho hapykuéri, ha osalva ko ovecha raʼy pe óso jurúgui. Ha oñemboʼývo pe óso, ko mitãrusu ojagarra ojuka! Avei ko mitãrusu osalvamavaʼekue peteĩ leóngui peteĩ ovechápe. Ajépa ipyʼaguasu ojapo hag̃ua koʼã mbaʼe? Ndépa reikuaa mávapa ko mitãrusu?

Héra David. Haʼe oiko pe puévlo hérava Belénpe. David avuélo héra Obed, Rut ha Boaz família. Nemanduʼápa hesekuéra? Ha David túva héra Jesé. David oñangareko itúva ovechakuéra rehe. Haʼe onase 10 áño Jehová oiporavo rire Saúlpe oiko hag̃ua chugui rréi.

Peteĩ árape Jehová heʼi Samuélpe: ‘Ejagarra michĩmi pe aséite espesiál ha tereho Jesé rógape Belénpe. Aiporavóma itaʼyrakuéra apytégui peteĩme oiko hag̃ua chugui rréi’. Samuel ohechávo Eliábpe, Jesé raʼy tuichavéva, heʼi ipyʼapýpe: ‘Kóva haʼéne katuete’. Péro Jehová heʼi chupe: ‘Ani remaña ijyvate térã iporã rehe. Ndaiporavói chupe haʼe hag̃ua rréi’.

Upévare Jesé ohenói itaʼýra Abinadábpe ha ogueraha Samuel rendápe. Péro Samuel heʼi: ‘Nahániri, Jehová ndoiporavói avei chupe’. Upe rire, Jesé ogueru hendápe itaʼýra Samah. ‘Nahániri, Jehová ndoiporavói avei kóvape’, heʼi Samuel. Jesé ogueru siete itaʼyrakuéra Samuel rendápe, péro Jehová ndoiporavói ni peteĩme. ‘Koʼãvantepa nde raʼykuéra?’, oporandu Samuel.

‘Opyta gueteri pe imitãvéva. Péro oime oñangarekohína ovechakuérare’, heʼi Jesé. Oguerúvo hikuái Davídpe, Samuel ohecha iporãha. ‘Kóva haʼe’, heʼi Jehová. ‘Eñohẽ hese pe aséite.’ Ha Samuel ojapo upéicha. Upe rire, Davídgui oikóta rréi Israélpe.